Inatsisartut

Demokraatit: Ilagiinnut akileraaruteqalerli

Inatsisartut Ilagiinni ilaasortat kisimik akileraartalersillugit Ilagiinnut akileraarummik naapertuuttumik eqqussisoqarsinnaanersoq pillugu apeqquteqaat allaavigalugu,oqallinnissamik siunnersuut ilaatigut oqallisigineqassaaq.

- Tro og religion er en privat sag. Som land bør vi ikke bestemme, hvad folk skal tro på, siger formanden for Demokraterne Randi Vestergaard Evaldsen

- Upperneq upperisarlu inuit ataasiakkaat aalajangigassaraat. Nunatut aalajangersinnaasariaqanngilarput inuit suut upperissaneraat.

Demokraatit siulittaasuat, Randi Vestergaard Evaldsen, taama allappoq, taanna Inatsisartunut apeqquteqaat allaavigalugu oqallinnissamik siunnersuummi saqqummiussivoq.

Ilagiinnut akileraaruteqalernissaa kissaatigaa, taamalilluni Ilagiinnut ilaasortat kisimik tassunga akileraartalissallutik.

- Demokraatini isumaqarpugut innuttaasut ilagiinni upperisanut ilaasortaaffiginngisaminnut akiliisarunnaarnissaminnut periarfissinneqarnissaat piffissanngortoq - aamma Ilagiit pineqartillugit. Taamaasillutik innuttaasut Ilagiinnut ullumikkut akileeqataasarput aamma qitornatik oqaluffimmi kuisissinnaanngikkaluarpataluunniit, angajoqqaat ilagiinnut ilaasortaannginnerat pissutigalugu, taanna oqarpoq.

Nammineq toqqaasinnaasariaqartut
Innuttaasut ataasiakkaat Ilagiinnut ilaasortaagunik akileraartarnissaminnut periarfissaqartinnissaat, Demokraatinit pingaartinneqarpoq.

- Paarlattuanik Demokraatini isumaqarpugut, innuttaasut Ilagiinnut nammineq piumassutsiminnik ilaasortaarusunngitsut ingerlatanut akiliisassanngitsut, peqataaffigisinnaanngisaminnut. Peqataanilli nunami oqaluffiit kulturikkut kingornussaanertik ataqqillugu ingerlassapput, tassa oqaluttuarisaanikkut kulturikkullu kingornussaaneq pissutigalugu oqaluffiit suliamut tassunga atugassanik aningaasanut inatsimmit toqqaannartumik tapiiffigineqartassapput, Randi Vestergaard Evaldsen ilaatigut oqarpoq.

Apeqquteqaat aallaavigalugu oqallisissiaq oktobarip 24-anni oqallisigineqassaaq.

Powered by Labrador CMS