Demokraatit Doris eqqissisimatippaat - maannamuugallartoq
Benziinamut akiliut pillugu suliaq kukkunersiuinermut ataatsimiitsitaliami tamakkiisumik erseqqissarteqqaarlugu, tamanna Doris J. Jensenimut kinguneqartinneqassanersoq aalajangiiniarput.
- Pisortat aningaasaataannik atornerluisoqartillugu nipituuliornerpaasarunarput, Demokraatineersoq Randi Vestergaard Evaldsen Sermitsiaq.AG-mut taama oqarpoq.
Qitiusumik inissisimasut
Demokraatit maanna naalakkersuisoqatigiit amerlanerussuteqarnissaannut tunngaviannik qulakkeerinnittuupput, taaamaalillutillu benziinamut akiliut pillugu suliaq Inatsisartuni tatiginninnginnermik oqaaseqaateqarnermik kinguneqassagaluarpat qitiusumik inissisimapput.
Demokraatit kisianni maanna suliami aalajangiinianngikkallarput.
Nalunaarusiaq utaqqigaat
- Nalunaarusiap naammassineqarnissaa utaqqiniarparput, taanna Inatsisartuni kukkunersiuinermut ataatsimiititaliap suliarileruttorpaa. Suliaq tamaat erseqqissarteqqaarlugu aatsaat aalajangeerusuppugut. Kukkunersiuinermut ataatsimiititaliap nalunaarusiaa piareerpat, suliaq pillugu oqaaseqarnissatsinnut piariissaagut, Demokraatit siulittaasorisimasaat oqarpoq.
- Kukkunersiuinermut ataatsimiititaliap suliaq apeqqutinik qulaajaneqanngitsunik pilersitsisoq qulaajaleruttoraat aalajangiissagutta, innuttaasunut tamanna naleqquttuunavianngilaq, Randi Vestergaard Evaldsen oqarpoq.
Kielsen aamma utaqqivoq
Naalakkersuisut siulittaasuata aamma Doris J. Jensen eqqissisimatippaa, kukkunersiuinermullu ataatsimiititaliap nalunaarusiaa utaqqinerarlugu, allatsini KNR-imut ilisimatitsissuteqartissimavaa.