Skip to main content

Demokraatit avissaartuutinnginnerarput

Demokraatit Nuummi immikkoortortaqarfiata siulittaasua partiillu siulittaasuat isumaqatigiinnginnerarneqarnerat ilumuunnginnerarpaat. Partiillu kina borgmesteritut toqqarneqarumaarnersoq suli aalajangiiffigisimannginnerarpaat.

Sermitsiaq.AG-p arfininngornerup ullaap-tungaani Tillie Martinussenip ima oqarnerat issuaaffigaat:

- Maanna suleqatigiinneq ingerlatiinnassallugu sulissutigaarput.

Sermersooq Kitaani kina borgmesterinngussanersoq aalajangiissuussasoq Tillie Martinusseni isumaqarpoq.

Oqaaseqarnermut tunngavik

Atuagalliutini kingullerni saqqummertumi Randi Vertergaard Evaldsenip kina borgmesteritut qinissanerlugu aperineqarnermini akissuteqaataa qisuariarfigineqarpoq.

- Partii sorleq neqerooruteqarneruniarnersoq taamaallaat apeqqutaassaaq.

Atuaruk: Partiip peqatigiiffiata siulittaasortik inissaanut inissikkaat

Arfininngorneq ullororluinnarlersoq taakku marluullutik tusagassiuutinut nalunaaruteqarput isumaqatigiinnginnerarneqarnertik aaqqiiffiginiarlugu.

- Uanilu pisumi ajoraluartumik oqallittoqalerpoq Demokraatit siulittaasuat Randi Vestergaard Evaldsen Kommuneqarfik Sermersuumi siulersuisunik inissinneqarsimasoq. Allaaserisami aamma atuarneqarsinnaavoq Demokraatit Asii Chemnitz Narup borgmesteritut toqqarumaaraat. Oqaatigineqartut tamarmik ilumuunngillat, Randi Vestergaard Evaldsen Tillie Martinussenilu allapput.

"Suleqatigiinneq nuannaraat"

Inuit Ataqatigiit qinersinermi uani suleqatigineri nuannarinerarlugu aamma allapput.

- Demokraatini inerititaqarluartumik suleqatigiinnerput iluareqaarput. Maannagaarli oqaatigisinnaanngilarput ilumut taamaakkumaarnersoq (suleqatigeeqqinnissaq, aaqq.).

Atuaruk: Randi aalajangiisuusinnaavoq

Politikkerit taakku marluk "Kommuneqarfik Sermersuumi Demokraatini ullormi qinersivimmi apriilip ulluisa sisamaanni taasinerit suli kisinneqanngitsut borgmesterissamik toqqaanaviarnatik" aalajangiusimavaat.

Taannalu tunaartaralugu Demokraatini avissaartuuttoqanngitsoq tusagassiuutinut nalunaarummi naqissuserpaat.

- Taamaattumik arlaannarpulluunniit inissinneqarnikuunngilaq Sermitsiaq.ag-mi allaaserineqartutut, Randi Vestergaard Evaldsen Tillie Martinussenilu naqissusiipput.

Allaaserisami taakku marluk qisuariarfigisaanni Tillie Martinussen ima oqaaseqaraluarpoq:

- Randip oqiartuutai eqqartornikuuagut. Nalunngilaa qanoq isumaqarnersugut.

Demokraatini Sermersooq Kitaani siulittaasup Randip AG-mut oqaaserisimasai sooq eqqartortariaqarsimanersut tusagassiuutinut nalunaarummi itisilerneqanngillat.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER