Demokraatit angusarissaarnerpaallutik ajugaapput
Inatsisartunut qinersinermi Demokraatit 7,7 procentimik siuariaramik siuariarnerpaapput, taasinerillu 19,5 procentii pissarsiaraat. Partii maanna Inatsisartuni annersaat pingajuattut inissippoq. Niels Thomsenip ingammik taasinerit partiimut nusuppai.
- Demokraatit piviusorsiornerusumik politikkiat Nunatta pisariaqartikkaa, inernerata takutippaa, partiimi siulittaasoq nuannaartoq, Randi Vestergaard Evaldsen oqarpoq, partiip Nuummi katerisimaarfianit anisitaaqqammernerisa kingorna taanna oqaloqatigaarput.
- Siuariarujussuarnerput nuannertorujussuuvoq, taanna naqissusiivoq.
Siuariarneq sumik pissuteqarpa?
- Arlalippassuartigut ersarissumik politikkeqaratta siuariarpugut, aammalu Naalakkersuisuusut ukiuni marlunni kingullerni piviusorsiunngitsunik aallartitsinikuunerannik.
Suna eqqarsaatigaajuk?
- Ilaatigut tunngavisumik inatsisissamut isumalioqatigiissitaq, aalisarnermullu inatsit, inuiaqatigiinnut kingunissaanik ilisimasaqarfigineqanngitsoq.
Demokraatit aalisarnermut inatsit qanoq imaqarnissaanik isumaqarpat?
- Savalimmiormiut periusaat tapersersorparput, tassani pisassiissutit ersarissumik paasiuminartumillu agguaanneqartarput. Naalakkersuisut pisassiissutinik agguaasuusarnissaannik isumaqanngilagut, kisianni akitsorterussisoqarneratigut pisassaaq, niuernerullu pisassiissutit agguaanneqarnerat aalajangertassavaa, taamaalilluni aalisarneq inuiaqatigiinnut iluaqutaasoq pissagatsigu.
- Namminiilivinnissaq pillugu apeqqummut piviusorsiorpalaarnerusumik isummersoratta siuariarpugut. Aammattaaq innuussutissarsiornermut, ilinniartitaanermut aamma akileraartarnermut ersarissumik politikkeqaratta.
- Liberaliusumik aamma talerperliunerusumik politikkeqarnerput ajugaassutigaarput, partiimi siulittaasoq naqissusiivoq.
Demokraatit kikkut suleqatiginiarpaat?
- Demokraatit politikkiat aamma ilungersuussaat pitsaanerpaamik qanoq ililluta suliarisinnaanissaat apeqqutaalluinnarpoq. Liberaliusumik politikkimik ingerlatsisoqarnissaa kissaatigaarput, aaqqissuusseqqinnerillu pisariaqartinneqartut aallartisassavagut. Aammattaaq akileraarutit/imaluunniit akitsuutit apparneqarnissaat piumasaraarput. Nunarput akileraarutitigut tatisimaneqarpallaaqaaq.
- Inuiaqatigiit tamanna kissaatigigaat, qinersinerup takutippaa, Randi Vestergaard Evaldsen tikkuaavoq.
Niels Thomsen ingammik inuttaasunit nuannarineqarpoq, kisianni aamma Nivi Olsen taaguunneqarluarpoq. Partiimi siulittaasoq Randi Vestergaard Evalsen pingajuattut inissisimavoq.
Taaguunneqarnerpaat
Taasinerit:
- Niels Thomsen 2.710
- Nivi Olsen 874
- Randi Vestergaard Evaldsen 579
- Justus Hansen 194
- Henrik Thomsen 98
- Malene Vahl Rasmussen 80
Steen Lynge arfineq-aappaattut inissisimavoq, kisianni partii arfiniliinnarnik ilaasortaatitaqarpoq. Steen Lynge 75-nit taaguunneqarpoq.