Demokraatit amerlanerit sulilersinniarpaat
Sulisussaaleqinermi nunap iluani aaqqiinissaq ujartorneqaqqaartariaqarpoq, sulisussallu nuutsinneqarsinnaasariaqarlutik, taassuma kingorna avataaneersut aatsaat isiginiarneqartariaqarlutik. Demokraatineersoq Steen Lynge taama isumaqarpoq.
Suliassarujussuit utaqqiinnalerput. Mittarfissat, aserfallatsaaliinerit illoqarfiillu inerisarnissaat. Suliniutini sulisussanik pisariaqartitsisoqarpoq, Kalaallit Nunaannili sulisussat naammanngillat. . Steen Lynge (D) tusagassiutinut nalunaaruteqarluni allappoq.
Steen Lyngep tusagassiutinut nalunaarummini sulisussaaleqinermi aaqqiissutissat pingasut taavai. Taanna isumaqarpoq siullertut nunap iluani ilummut qiviarluni aaqqiiniartoqartariaqartoq.
- Allatut ajornartumik sulisinnaasut arlaannilli pissuteqarlutik suliumanatik pisortat ikiorsiissutaannik nappateqartut, sulilersinnissaat pikkoriffiginerusariaqalerparput. Inuit tamakku sulilersinniarlugit pinngitsaalisariaqarput aamma ikiorsiissutaannut kinguneqartariaqarpoq suliffissarsissunneqarnerminni naaggaasagaluarpata imaluunniit piaaralutik suliffittaatik paariumanngippatigit , Steen Lynge allappoq.
Sulisinnaasut nuutsinneqarsinnaanissaat
Suliffeqanngitsut amerlanerusut sulilersinnerisa saniatigut suliffissaq tikillugu sulisussat ajornannginnerusumik nuuttalernissaat, Steen Lyngep sulissutigerusuppaa. Tassunga atatillugu nuttarnermut ikiorsiissutit taavai, nuttartoqarnerulernissaali anguniarlugu qanoq iliortoqassanersoq taanagu.
Naggasiullugu Sulisitsisut qaammatini kingullerni arfinilinni oqaatigisariingaatut Steen Lynge allappoq, tassa avataaniit suliartortunik tikisitsisoqartarnera ajornannginnerulertariaqartoq.
- Kikkulluunniit sulisinnaasut pissarsiariniartariaqarpagut aamma suliffissaaleqisut tamaasa sulisileraluarutsigilluunniit sulisussanik naammattut pigilernavianngilagut. Tamanna tunngavigalugu allatut ajornartumik akuerisariaqarparput avataaniik sulisussanik tikisiortortitsinissaq pisariaqarluinnarmat.
Akit qaffariartupiloornissaanik pinngitsoortitsinissaq
Steen Lyngep nalunaarutaa naapertorlugu avataaniit sulisussanik tikisiortortitsinerup aningaasartuutit appasitsissavai. Taassuma ilaatigut eqqaavaa sumiiffinni allani akit akissarsiallu qaffapiloortarneri takussaasut.
- Suliassaqarpallaarnerup kinguneranik akit akissarsiallu qaffariartortarnerat avannaani takoreerparput pisortat sanaartortitsiniarnerigaluat unitsinneqarmat, sanaartortut malinnaasinnaannginnerat pissutaalluni kvadratmeterimut akit allaat 40.000 koruunit 60.000 koruunillu akornanniilerluni. Pissutsit taamaattut nunatta sinneranut siaruaateriaannaapput, mittarfiliortiternerit aallartippata.
Steen Lynge Naalakkersuisut kaammattorpai piaarnerpaamik sulisitsisut kattuffiinik oqaloqateqassasut aaqqiinissaq siunertaralugu, taamatullu nunanit allanit sulisussanik tikisitsiortornerup tamanut iluaqutaanissaa anguniarlugu.