Demokraatit: Akissarsiaqqortunerit immikkut akileraaruserneqarnissaat isumassarsialatsiaanngilaq

- Isumaqatiginanngilluinarpoq akissarsiaqqortunerit immikkut akileraarutaannik saamerliit naalakkersuisoqatigiit atuuttussanngortitsiniarnerat.

Naalakkersuisut akissarsiaqqortunerit ukiumut 1 millionit sinnerlugit akissarsiallit immikkut akileraarusersueriaatsimik siunnersuuteqarnerisa kingorna, Inatsisartuni ilaasortaq Nivi Olsen (D) taama oqarpoq.

Akissarsiaqqortunerit immikkut akileraarutaata ilinniagartuunngorniarluni sivisuumik ilinniartarneq pilerinannginnerulersissavaa aamma aallarnisaasartuunik pilerinannginnerulissaaq, taanna oqarpoq.

- Aappassaatut akissarsiaqqortunerit immikkut akileraartittalerutsigit immikkut ilisimasalinnik nunatsinni pissarsiniartarnerput ajornarnerulissaaq. Timmisartunut suluusalinnut mittarfiliornissat tulliuttut eqqarsaatigalugit sanaartornerit tamakku annertuut piviusunngortinneqassappata pisariaqartussaavoq ilinniarluarsimasunik misilittagartuunillu inginiørinik, illussanik titartaasartunik aamma aningaasarsiornermut immikkut ilisimasalinnik sulisussarsisariaqarnissarput, ilinniagallit sulisussarsiarineqartariaqartussat ilaannaat eqqarsaatigalugit. Tamakkunannga sulisussarsiniarnissaq akissarsiaqqortunerit immikkut akileraarutaannik eqqussinikkut ajornarnerulissaaq, Nivi Olsen erseqqissaavoq.

Tunngavilersuutit pitsaasut amingaatigigai

Taannalu naapertorlugu akissarsiaqqortunerit immikkut akileraarutaannik eqqussigutta sulisut sulinerunissaminnut piumassusaat mangiarneqassaaq.

- Amerlanngitsut sivisunerusumik suliumassuseqalissapput, Namminersorlutik Oqartussat akissarsiat amerlanersaannik arsaartuilissammata. Nalunngilara saamerlernit saassunneqassaqqaarlunga oqaluttunik pineqartut taamaallaat tassaasut 1 million koruunit sinnerlugit ukiumut akissarsiallit. Kisianni tunngavilersuutit pitsaasut amingaatigaakka sooq inuit ingerlalluartut pillarneqassanersut? Millioni sinnerlugu akissarsiortoqalernavianngilaq eqiasuittuunngikkaanni angusaqarusussuseqartuullunilu. Demokraatini qujassutissaqarfigaagut inuit eqiasuittut aamma angusaqarusussuseqartut - inuit taamaattut pillarusunngilagut, taanna oqarpoq.

D: Akissarsiaqqortunerit immikkut akileraaruserneqalerpata piitsuunerulissaagut

Paarlattuanik Demokraatit kissaatigaat, sulisartut akiuutissatut ilungersornerulerlutillu, amerlanerusunik akissarsiaqalerniassammata taamaasillutillu inuiaqatigiinnut suli annerusumik pilersueqataalerlutik.

- Inuiaqatigiit pisariaqartippaat inuit eqiasuittut angusaqarusussuseqartullu sulinissaminnut kajumissuseqartut aamma nunatsinni najugaqarusuttut - pisariaqartinngilarput qimarratsitsinissaq. Alla pingaaruteqartoq oqaatigisariaqartoq tassaavoq akissarsiaqqortunerit immikkut akileraarutaat eqqunneqarniariarpat politikerinut ajornanngitsuararsuanngortussaavoq akissarsiat killiginik qummut nikiseqattaarilernissaq, suli amerlanerusut akissarsiaqqortuneit akileraarnerusalernissaat angujumallugu. Tamanna pippat piitsuunerulertussaavugut, Nivi Olsen tikkuaavoq.

Demokraatini taamaattumik naalakkersuisoqatigiit akissarsiaqqortunerit immikkut akileraarutaannik eqqussiniarnerannut qujaannarpugut.

- Paarlattuanik Naalakkersuisunut naatsumik innersuussutigiinnassavarput pisortaqarfinni atorfillit amerlassusaat qissimeqqullugit. Amerlavallaareerput aamma suli amerliartorput. Aningaasat ilarpaalussui pisariillisaanikkut pissarsiarineqarsinnaapput pisortat
ingerlatsiviini angivallaareeqisuni, Nivi Olsen oqarpoq.

Atuaruk: 2018-mut aningaasaqarnermut inatsisissatut siunnersuut sinneqartoorfiulaassaaq