Skip to main content

Demokraatit akiliisitsiniartarnissamik qulakkeerinninnissamut piareeqqasut

Akiliisitsiniartarfissaq Ilanngaassivik Inatsisartuni amerlanerussuteqalaartunit akueriniarneqarpasippoq. Illuatungiliuttut aningaasat atorsinnaasat amerlanerunissaannik piumasaqarput.

Akiliisitsiniartarfiup Ilanngaassiviup atuutsinneqalernissaanik siunnersuut naalakkersuisooqatigiinnit taakkulu tapersersortaannit Demokraatinit taamaallaat akueriniarneqarpasippoq. Illuatungiliuttut siunnersuut taamatut isikkoqartillugu tapersersorsinnaanngilaat.

Ilanngaassivik atuutsinneqalerpat, pisortanut akiitsullit aqunneqalissapput. Tassa imatut paasillugu, aningaasarsiassat tunniunneqannginneranni pisortanut akiligassat ingerlaannartumik ilanngaatigineqartalissapput.

Akiligassalli akilerneqareerpata nammineq aningaasat atugassat minnerpaaffilerneqarsimapput. Tassa inuttaasoq qaammammut 4.000 koruunit inorlugit aningaasassaqassappat akiligassat tunngaviatigut akileqquneqassanngillat, aappariillu qaammammut 6.000 koruunit inorlugit aningaasassaqassappata tamanna aamma atuutsinneqassalluni. Meeraqaraanni najugaqatigisanik 18-it inorlugit ukiulinnik aningaasat nammineq atugassat qaffanneqassapput.

Aningaasat nammineq atorsinnaasat isumaqatigiinngissutaasut

Aningaasat nammineq atorsinnaasat tassarpiaapput isumaqatigiinngissuteqarnermi qitiusut. Inuit Ataqatigiit Partii Naleqqallu, assersuutigalugu 'SIK-p tusarniaanermut akissuteqarnermini siunnersuutigisimasaata annertoqqataannik' qaffaasoqarnissaa pillugu naaperiaassutitut siunnersuutigisimagaluarpaat. SIK-mi siunnersuutigineqarsimavoq kisermaat qaammammut 7.000 koruuninik aappariillu 10.000 koruuninik namminneq atorsinnaasaminnik aningaasaateqartassasut.

Siunnersuulli Aningaasaqarnermut Ataatsimiititaliami

amerlanerussuteqartut, tassa Siumumit Demokraatinillu tapersersorneqanngilaq.

Siunnersuut Inatsisartut ataatsimiittarfianni sammineqaqqaarmat Partii Naleqqap IA-llu saniatigut Suleqatigiissitsisut Atassullu aamma sakkortuunik oqaaseqarsimapput. Nunatta Qitornai siunnersuummut tunngaviatigut tapersersuillutik.

Inatsisissatut siunnersuut sisamanngorpat aappassaaneerlugu suliarineqassaaq, novembarillu 20-ani inaarutaasumik taasissutigineqassalluni.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER