kommunimut qinersineq
Demokraatinut qinigassanngortittup Qaasuitsup Kommuniani inuttassarsiuvisarnermut siunnersuuteqarpoq
Qaasuitsup kommuniani Demokraatineersoq Frantz Ferenkamp Nielsenip siunnersuutigaa naammassisaqarusussuseq tunngavigalugu ajornaatsumik atorfiit inuttassarsiuunneqartalertariaqartut.
Ilulissani Demokraatit immikkoortortaqarfiata paasiuminaatsippaa Nunatsinni kommunit annerpaartaanni inunnik isumaginninnikkut unittooqqasoqarnera.
Marsimi AG-p allaaseraa inunnik isumaginninnerup iluani atorfiit 55-t kommuneqarfiup allaffiani inuttassarsiunneqarsimanngitsulluunniit.
Tamanna pissutigalugu Ilulissani Demokraatit immikkoortoqarfiani siulittaasup, Frantz Ferenkamp Nielsenip, Kommunalbestyrelsemut qinigassanngorteqataasup, Qaasuitsup Kommuniani sulisussarsiortarnermut siunnersuuteqarpoq
Piffissaajartoqassanngilaq
- Kissaatigaarput Qaasuitsup Kommuneata atorfiit inuttaqanngitsut sukkanerpaamik inuttassarsiuullugit aallartittariaqarai, immikkullu pisariaqarpoq atorfiit naliginnaasut inuttalernissaat, tassanimi sulisussarsiorluni allagarsiissutaareernikuusimasut atoqqinneqarsinnaapput. Kommunip aningaasaatai suliami tassani atortariaqarput, sukkanerpaamik aallartittariaqarpugut, Frantz Ferenkamp Nielsen, tusagassiuutinut nalunaarusiamini oqarpoq.
Ajornaatsuinnaaneq ajorpoq kommunimi atorfinnut pilerititsilernissaq atorfinittullu tigummiinnarnissaat.
- Taamaattumik Demokraatini sulissutigilerusupparput sulisussarsiornermi sinaakkutit pilerinarnerulernissaat. Soorunami akissarsiat pitsaasuusariaqarput aamma sullivik nuannersuusariaqarpoq, kommunimili sinaakkutit silarliit pilersaarusiornitsinni ilannguttariaqarpagut kommunimi sulisussat pikkorissut pilerisaarnialeraangatsigit, Demokraatit Ilulissani immikkoortoqarfiani siulittaasoq oqarpoq.
Atuaruk: D: Inuttassarsiuisannginnerit akuersaarneqarsinnaanngillat
Ajornartorsiutit aaqqiiffigineqarlik
Najukkami politikeri isumaqarpoq borgmesteri kommunillu allaffiani atorfillit nassuiaasariaqaraluartut, atorfiit inuttaqanngitsorpassuit pillugit eqqortoq tamanit paasineqarmat.
- Isumaqarpunga kommuni meeqqanik, inuusuttunik ilaqutariinnillu ikiortarialinnik sumiginnaaqataasoq. Soormitaavaana akisussaasut ingerlaavartumik atorfiit inuttassarsiuunneqartut namminersorlutik oqartussat akeqanngitsumik atorfinnut inuttassarsiuussisarfianut ilannguttarsimanngikkaat?, Frantz Ferenkamp Nielsen aperivoq.
Frantz Ferenkamp Nielsenip siunnersuutigaa naammassisaqarusussuseq tunngavigalugu ajornaatsumik atorfiit inuttassarsiuunneqartalertariaqartut.
- Isumaqarpunga, Siumup IA-llu qinersisartut salloqittaraat suliassaminnik sumiginnaanermikkut, tamannalu ingerlasimavoq qinigaaffinni marlunni. Suliaq aallartittariaqarparput aaqqillugulu, Frantz Ferenkamp Nielsen oqarpoq.