Demokraatinut qinersisartut ikileriassangatinneqartut

Aalajangiinernut peqataasarneq tamatigut iluaqutaasanngilaq. Demokraatit tamanna isumasiuinermi nutaami uppernarsarsinnaassavaaat, partiimi 2018-imi qinersisoqarneranut sanilliullugu kinguariangaatsiartussaarpasippoq.

Partiimi siuliuttaasunngorlaap Jens-Frederik Nielsenip misissuisimanermi paasisaq tupaallaatigivallaanngilaa.

- Isumaqarpunga tamanna arlalippassuarnik pissuteqartoq. Siullermik partiimi nuimasut ilapassui annaasimavavut, taanna oqarpoq.

2014-imisulli amerlatigilersimasut

Partiimut 2014-imi Inatsisartunut qinersisoqarmat taasisimasut amerlaqqataannik taasisoqassangaluarpoq,tamatumunngalu pissutaasut pingasuusut Rasmus Leander Nielsen Ilisimatusarfimmi Inuiaqatigiilerinermi adjuktiullunilu misissueqataasimasoq isumaqarpoq. Taassuma partiimi siulittaasoq isumaqatigaa.

Misissuisimaneq

Paasissutissat Ilisimartusarfiup aamma Konrad Adenauer Stiftungip Stockhomimiittutp suleqatigiinnerisigut katersorneqarsimapput. Misissuinermi anguniarneqarsimavoq, innuttaasut nunanut allanut isumannaallisaanermullu politikkimut isumaat pillugit paasissutissanik katersinissaq. Partiimut qinersisimaneq tunngavittut atorneqarsimalluni.

Paasissutissat pissarsiarineqarsimasut tamarmiusut qularnassusaat 2.5-3 procentiuvoq, uppernassusaalu 95 procentiulluni. Apeqqutini akisassani arlalinni tunngavigineqarsimavoq, partiimik qinersisineq pillugu apeqqutit nangaanartortaqarnerat.

- Kinguariarnerannut pissutaanerpaagunarpoq, Niels Thomsenip sunniuteqarsimanera. Taanna 2018-imi qinersisoqarmat 2.800-ngajalluinnarnik taaguunneqarsimagami, maanna politikkimut uteqqittussaanani, aamma partiimi qinigaalluartartoq Randi Vestergaard Evaldsen annaasimavaat.

- Aappaattut akitsuutinik qaffaasoqaqqinnginnaanik qineqqusaarnermi neriorsuutigineqarsimasut malinneqarsimanngillat. 2021-mut aningaasanut inatsisissaq coronap tuniluunneranit sunnerneqarsimavoq, Erik Jensenillu partiimi siulittaasutut nutaatut Siumut saamimmut sangutissagunarpaa, taamalu talerperlermi inissisimasutut politikkimik ukiumi nutaami ingerlatsinissaq ajornarnerulissannguatsiarluni.

- Pinajuattut qinersisarnermik misissuisarnitsinni nalunngilarput naalakkersuisooqtaaneeq akeqartartoq. Partii ukiup affaa sinnilaaginnarlugu naalakkersuisooqataavoq, kisianni 2018-imili qinersisoqarmat naalakkersuisusunut tapersersortaasimalluni, Rasmus Leander oqarpoq.

Aalajangiinerit nuannarineqanngitsut akisusut

Jens-Frederik Nielsenip ilisimaarinerarpaa, politikkikkut aalajangiinerit nuannarineqanngitsut akeqarsinnaasut.

- Aningaasanut inatsisissaq ukioq manna akuerineqartussanngormat, pissusilersuutinik allannguisussanik akitsuusiinissaq pillugu pisariaqartumik aalajangiinissaq peqataaffigissallugu oqitsuinnaasimanngilaq, tamannalu qularnanngitsumik qinersisartuttat ilaannik akeqarsimassaaq, siulittaasoq nassueruteqarpoq.

Taassuma oqaatigaa, partii inissisimanerminit ingerlariaqqiffissaminiillunilu tunngavissamik nassaarniaqqiffissaminiittoq.

- PIffissamik atuiffiussaaq ingerlatsinerullut tamanna ilagaa. Siunissami innuttaasunut sammititamik akisussaaffeqarluni politikkeqarnissaq matumani pineqartoq, taanna isumaqarpoq.

- Politikkikkut aalajangiussaqaraangatta innuttaasunut qanoq sunniuteqassanersoq eqqaamajuaannartussaavarput. Assersuutiglugu aningaasanut inatsisissami akuereqqammisatsinni akitsuutinik qaffaasoqarnianngilaq. Suliassap naammassiniarnera sivisusimavoq, qinersisartuniillu tatigineqaqqilernissarput sulissutigissavarput. Tamanna uanga nammineq partiillu tamarmiusup suliassaraarput, Jens-Frederik Nielsen naggasiilluni oqarpoq.

Demokraatit taasisorisartakkatik tamaasa illoqarfinnit annerusunit pissarsiarisarpaat, isumasiuinermi nutaami tamanna atuarneqarsinnaavoq.