eqqaaniut
Demokraatinit Dino toquvoq
Inatsisartuni siornatigut ilaasortaasoq, Jørgen-Ole Nyboe Nielsen, aamma Dinomik ilisimaneqartoq, akunnerup naanerani toquvoq
Jørgen-Ole Nyboe Nielsen 1998-mi politikkikkut suliaqarnini Pituffimmi aallartippaa.
Tassani annertuumik suliaqarpoq, arlaleriarluni siulittaasuusarluni. Pituffimmi innuttaasut pisinnaatitaaffii Dinop suliarai, Demokraatinit Justus Hansen allappoq.
Dino ilisimasaqarluartuusoq, pitsaasoq, anguniakkaminik sulissutigisaqartartuusorlu Justus Hansenip oqaatigaa.
Radarinik suliaqartartoq
Jørgen-Ole Nyboe Nielsen 1948-mi marsip qulingiluaanni inuuvoq, inuunermilu ilarujussua Pituffimmi innuttaasuulluni. Radarinik suliaqartartutut sulisalerpoq 1974-mi. Utoqqalinersiaqalernissi tikillugu Pituffimmi najugaqarpoq, tassanngaanniillu Danmarkimut nuulluni.
Demokraatit 2002-mi pilersinneqarmata peqataavoq. Dino siunnersuuterpassuaqartartoq aamma aalassarilluni sulisartuusoq Justus Hansenip nassuarpaa.
Jørgen-Ole Nybroe arlaleriarluni paarlatitut Inatsisartuni ilaasortaavoq.
Ukioq ataasingajak
Ilaasortaagami sivisunerpaamik aprilip 13-anit 2012-mit marsip 13-ata tungaanut 2013-mi Inatsisartuni ilaasortaavoq. Aalisarnermut, Piniarnermut Nunalerinermut ataatsimiititaliami kiisalu Kultureqarnermut, Ilageeqarnermut, Naligiissitaanermut, Ilinniartitaanermullu ataatsimiititaliami ilaasortaavoq ilaasortaanermi nalaani.