Demokraatini qinigaanerpaaq: Oqariartuutissaqarpunga

Demokraatineersup Nivi Olsenip, Inatsisartunut qinersinermi 1428-nit qinerneqarluni qinigaalluartup, inuusuttut meeqqat atuarfiannit anisartut amerlanerit ilinniaqqiffinnut ingerlaqqittarnissaat angorusuppaa.

- Inuusuttut susaqanngitsut ikilisikkusuppakka assorujuk. Taanna siullertut angorusuppara. Tulliatut ilinniartitaaneq. Ullumikkummi meeqqat atuarfianniit anisunit 50 procentit kisimik ilinniagaqalersarput. Taanna qaffatsikkusuppara. Tassa kisitsit taanna 85 procentimut inissittariaqarpoq, Nivi Olsen, Ilisimatusarfimmit inuiaqatigiilerinermi ilinniagartuujusoq, ullumikkut Niuernermik Ilinniarfimmi ilinniartitsisuusoq taama oqarpoq.

Nivi Olsen kandidatinngorniarluni ilinniarpoq Niuernermik Ilinniarfimmi ilinniartitsisuunermi saniatigut.

- Meeraaninni isumaqatiginngisaqaraangama oqarneq ajorpunga. Tusarnaaginnartarpunga akissananga. Ilisimatusarfimmukarpunga suli taamaattuullunga. Kisianni tassa piffissanngormat oqaluttorujunngorpunga. Tassani paasivara inuiaqatigiinnut tunniussassaqarlunga.

- Pingaarnerpaarpartaatut inuiaqatigiinnut oqaasissaqarama qineqqusaarpunga. Ilisimaqangaatsiarama inuiaqatigiinnut apuutassaqarlunga.

- Asuli isiginnaarusaaginnarnianngilanga nalunagu sumut ingerlasugut.

Atuaruk: Oqaluttuarisaanermut ilannguttoq: Qinigaasarsimasut nukarlersaat

Takussutissiaq: Qinersinermi taaguunneqarnerpaat

Angusarissaangaatsiarluni inuiaqatigiilerinermi kandidati
Nivi Olseni inuiaqatigiilerinermi kandidatiuvoq, karakterimik A-mik pissarsiffigalugu kandidatinngussutsimini sammisimavaa kalaallit sulinermut ileqquat kiisalu suliffeqarfinni ilinniarfinnilu inuusuttunik katagaasarneq.

- Meeqqagut amerlasoorparujuit piumasaqaatitaqanngitsumik perorsarneqarsimasut paasivara.

- Qallunaat kalaallillu akornatsinni kulturikkut assigiinngissuserput annertusoq paasivara. Assersuutigalugu kalaallini ataatsimuussuseq annertuumik atorneqartoq, qallunaani namminiussuseq atorneqarpoq. Soorlu kalaallit sukataarniaraangamik ‘ilatik’ qiviaqqaartarpaat sunersut isumaallu paasiniarlugit, tassa nammineq akisussaaffik tigunagu siumullu aallarsaratik.

- Taamaammat aamma atuartuutigut amerlasuut pikkorissut katattarpagut, taakkua ilatik pisinnaasamikkut annikinnerusumik inissisimasut apparfigisaramikkit, Nivi Olsen Inatsisartuni sulilernissaminut qilanaartoq taama oqarpoq.

Nivi Olsen Siumut sinnerlugu politikerip, Bernhardt Olsenip, Ilulissaneersup panigaa, taanna aamma Inatsisartunut qinigassanngortikkaluarpoq, qinigaananili.

Suna pissutigalugu Demokraatiuvit, ataatat Siumuusoq?

- Namminersornerullutik Oqartussaanerli eqqunneqarmat nunarput socialistiskimik ingerlanneqartuaannarnikuuvoq. Uanga liberaaliujuaannarnikuuvunga. Aamma taanna kalaallini utaqqiinnartunngortitsineq naammaginngilara. Kiisalu ukiuni 35-ini angusat annikippallaarujussuarput, Nivi Olsen, Niels Thomsenip inooqataanut aamma nukaasoq, taama oqarpoq.

Niels Thomsen Demokraatit sinnerlugit Inatsisartuni aamma ilaasortaanikuuvoq.