Skip to main content

Delta timmisartorsuarmi tuniluutilersimasoq

Juulip arfernani timmisartup ingerlaarnerani tuniluuttoqalerpoq, tuniluunnerup malitsigisaanik coronavirusi Nunatsinni illoqarfinni pingasuni atugaalerpoq.

Nunatsinni nakorsaanerup Henrik L. Hansenip ataasinngormat uppernarsarpaa, coronavirusi Delta tuniluutiaraasoq Nunatsinni atugaalersimasoq.

Nunatsinni nakorsaaneqarfimmit maanna oqaluttuarineqarpoq, Deltap piffissami kingullermi nunami maani qanoq tuniluutilersimanera.

Misissueqqissaarsimanerit takutippaat, Delta timmisartorsuup juulip arfernani Danmarkimiit nunatsinnukarnerani tuniluutilersimasoq:

- Tamatuma kinguneraa Ilulissani, Sisimiuni, Nuummi kingusinnerusukkullu Kujataani nappaammik tuniluuttoqalerneranik. Ilaatigut Qaqortumi tusarnaartitsisoqarnerani tunillaassuuttoqarluni.

- Tuniluuttoqarnerani misissortittut tamangajammik Deltamik tunillatsissimasut paasineqarpoq, ikittunnguit qulakkeerneqarsinnaasimanngillat misiligutini tigusat misissorluarneqarnissaanut naammassimanngimmata, Paneeraq Noahsen Nunatta Nakorsaaneqarfianeersoq tusagassiorfinnut nalunaaruteqarnermi nassuiaavoq.

Tupaallaatigineqanngitsoq

Nuummi Upernavimmilu tuniluunnerit ilisimaneqareersuni coronavirusit ilaat sorleq tuniluuttuunersoq pillugu akissutissat Nunatta Nakorsaaneqarfianit suli utaqqineqarput.

Innuttaasunut kaammattuutit

Innuttaasut tamarmik allanut attaveqarpallaannginnissaat aammalu qanimut attaviit ikinnerpaaffissaaniitinnissaat Nunatta Nakorsaaneqarfianit kaammattuutigineqarpoq.

Ilutigalugu innuttaasut ersiutit eqqumaffigissaagat aammalu innersuussutit nalinginnaasut malissagaat kaammattuutigineqarlunittaaq:

  • Ersiuteqaruit tunillanneqarsimasumulluunniit attaveqarsimaguit angerlarsimagit.
  • Assatit asakulakkit imaluunniit assanut sprit atortuk.
  • Tangajoruit quersoruilluunniit talinnik asseruk.
  • Assamminnerit, ersakkut kuninnerit pakkunnerillu pinaveersaakkit – timikkut allamut attuisarneq killileruk.
  • Eqqiluisaarneq eqqumaffigiuk - angerlarsimaffimmi aamma suliffinni.
  • Qanillinaveersaarit allallu taamatut ilioqqullugit.

Pissarsiffik: Nunatta Nakorsaaneqarfia

Paneeraq Noahsenip erseqqissaatigaa, Deltap nunatsinnut apuussimanera oqartussanit tupaallaatigineqanngitsoq. taanna Danmarkimi atugaanerpaammat, taamaammallu malittarisassat inassuteqaatillu allanngortinneqanngitsut.

- Tusagassiortunik katersortitsinerni kingullerni oqatigineqareernikuuvoq coronavirusit ilaat tuniluunnerujussuusartoq nunatsinnut apuussimasinnaanera ilimagalugu, maanna qulakkeerparput. Piffissami sivitsortumi coronavirusit ilaat Delta Danmarkimi atugaanerpaasimavoq, tamaammat suliariaatsit suliniutillu sapaatit akunnerisa marluk matuma siorna aallartinneqartut pasitsaassinermik aallaaveqarput, Paneeraq Noahsen oqarpoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER