kommunit akornanni nalimmassaarineq
Debat: Partiit tamarmik kamapput
Siunnersuut nutaaq annertunerusumik assigiinngisitsilissaaq Kommuneqarfik Sermersoorlu nunami kommunini piitsuunersanngortissallugu, ataatsimut oqaaseqaammi allassimavoq
Nalimmassaarinermut siunnersuutip nutaap atuutilersinneqarnerani kommunimut kinguneqaatissai pillugit Kommuneqarfik Sermersuumi partiit tamarmik ataatsimoorlutdik oqaaseqaateqarput.
Oqaaseqaat tamakkerlugu ilanngupparput:
"Matumuuna Kommuneqarfik Sermersuumi partiit ataatsimoorluta Naalakkersuisut nalimmassaanermut aaqqissuusseqqinnissaannut akerliulluta nalunaaruteqarpugut.
Qaqutigoorpoq partiit imminnut akimorlutik taamatut tusagassiutinut nalunaaruteqartarnerat. Tamatuma ersersippaa partiit akunnitsinni aamma suleqatigiissinnaasugut. Nalimmassaanermi aaqqissuusseqqinnermi Kommuneqarfik Sermersuup 117 million koruuninik akiliuteqarnissaa partiit tamattaalluta akuersaarsinnaanngilarput.
Akuersaarneqarsinnaavoq Kommuneqarfik Sermersooq akiliuteqarnerussappat, tamannali eqqartussagutsigu kingunissaai aammalu killissaa eqqartortariaqarparput. Taamatut akiliuteqarnerunissaq soorunami Kommuneqarfik Sermersuumut annertuumik atugassaritatigut sunniuteqartussaassaaq.
Ullumikkut Kommune aningaasatigut inissisimanerloreeqisoq nalimmassaanermi aaqqissuusseqqinnerup nassatarisaanik suli aningaasatigut ajornartorsiornerulernissaa qularutiginngilarput. Kommuneqarfik Sermersuumi innuuttaasut sullinneqarnermikkut aammalu sooraarsitsiortornermik kinguneqarneqarsinnaanera ernumanartoqartipparput.
Kommuneqarfik Sermeruumi kommunalbestyrelsep ilungersuutaat matumani paasillugit, Partiit siulittaasui tamarmiulluta nalunaaruteqarpugut tapersiilluta aamma.
Naalakkersuisut siunnersuutaat malillugu nalimmassanermut aaqqissuusseqqittoqassappat piffissami ungasinnerusumi nunarput tamakkerlugu aningaasarsiornikkut ineriartortinneqarnissaanut akornusiisinnaanera partiit tamarmiullutik ernummatigivaat. Tamatuma nassatarissavaa nunatsinni ineriartortitsinissaagaluaq suliffissaaleqinerullu akiorniarneqarnera unikaallatsinneqarsinnaaneranik.
Taamaattumik Kommuneqarfik Sermersuumi partiit tamattaalluta Nalimmassaanermi aaqqissuusseqqinnerup innuttaasunut taama annertutigisumik kinguneqarsinnaanera akerleraarput.".
Partiit sinnerlugit partiit immikkoortortaqarfinni siulittaasut atsiorsimapput:
Mette Rasmussen Larsen, Siumut Nuuk, Ove F. Heilmann, Atassut Nuuk, Tikkili Isaksen, Nuummi Inuit Ataqatigiit, aamma Mike Andersen Demokraatit.