Datahalit Islandip suliffeqarfiisa nutaat nukittuut ilagaat
Halerujussuit qarasaasianik suliuartunik aamma tunisassiortuartunik tuusintilikkaanik imaqartut, Islandip kujataata kangiani nunap ilaani takussaapput.
Tassanngaannaq asfalteqarunnaarpoq, taamaallaallu assakaasut aqqutigisimasaat illorsuaqarfiup tungaanut aqqummi takussaapput. Kommunip aqqusinniornermi ingeniøria Reykjavikip eqqaani datahalit ineriartupiloornerannut nunatarujussuarmi malinnaasinnaanngilaq.
Islandimi aningaaseriveqarfiit ajalusoornerisa kingorna, datahalit, qarasaasianik tuusinilikkaanik imaqartut, nunami suliffeqarfiit nutaat nukittuut ilagilerpaat.
Taakku nukissiornermik akikitsumik aamma silaannarmi nillataartumi nillarsaanermik tunngaveqarput, tamatumalu aningaasaliisartut amerliartuinnartut qeqertamut pilerisutsilerpai.
Datahalit nutaat qeqertaasami Reykjanesimi katersuussimapput, taanna Reykjavikimit akunneq ataaseq biilinik ingerlalluni tikinneqarsinnaavoq.
- Manna sumiiffik malunnanngitsumik inissisimammat toqqarparput, kisianni taamaakkaluartoq mittarfissuarmut qanittunnguuvoq, Árni Jensen, Etix Everywhere Borealisimi, datacenterinik imaluunniit datahalinik sanaartortartuni aqutsisut ilaat taama oqarpoq.
Suliat ingerlanneqartut allat marluk, nunami datacenterinik aningaasaliinermik ingerlataqartut tassaapput, Verne Global aamma Advania.
Árni Jensen sumiiffimmut ungasissumut tikkuartorpoq, tassani pujoq qaqortoq silaannarmut pujoortoq takuneqarsinnaavoq.
- Aammattaaq ajornanngitsumik nukissiorfimmut nunap iluanit kiassarneqartumut attaveqalersinnaavugut, taanna datahalimik ukiakkut 2018-imeersumik, amerikamiut timmisartoqarfigisimasaanni betonit toqqorsiviusimasut eqqaanni takutitsinermi oqarpoq.
Sakkutooqarfik 2006-imi matuneqarpoq, sulisullu 1.000-nit amerlanerusut Islandimi Kangianut Qiterlermut nuutsinneqarput.
Ineriartortoqarnerata kinguneranik Islandip kitaata kangiani qeqertaasami, illoqarfiit Keflavikip aamma Njardavikip kiisalu qeqertap mittarfiisa annersaata inissisimaffigisaat, illorsuarnik metaliusunik qulinik OL-imi naluttarfiup angeqqataanik angissusilinnik peqalersimavoq.
Silaannaq nillataartoq, ukiumut agguaqatigiisillugu gradinik tallimanik kiassuseqartoq datacenterinut tulluartorujussuusoq, Árni Jensen oqarpoq.
- Sarfaliuutissamaatinik, batteerinik imaluunniit nillusaatinik atorfissaqartitsinngilagut. Anori toqqaannartumik ilummut supitiinnartarparput, illorsuup silaannarissaataanit supisup nipitunera qallerniarlugu nippalluni taamma oqarpoq.
Aningaasaqarnikkut ajalusoornerup kingorna aningaasaqarnikkut aaqqiiniarnermut Islandip takornariaqarnermit aningaasarsiornera pingaarnersaasimasoq, datacenterinik suliffissuaqarneq annerpaamik allileriffiusimavoq.
Suliffeqarnermi nukissamik atuinerup ukioq manna 150 megawattinngornissaa naatsorsuutigineqarpoq, 2017-imi atuinerup 25 megawattiuneranit tamanna annertuseriarnerujussuuvoq.
Tamatuma kinguneranik suliffeqarfissuaq Islandimi ullumikkut innaallagissap pilersinneqartup 5 procentiisa missaannik atuisoqartarpoq. Datacenterit taamaalillutik islandimi nukissiorfinni atuisuni pingaarneruleraluttuinnarput – ingerlatseqatigiiffik naalagaaffimmit pigineqartoq Landsvirkjun taakkunani ilaavoq.
Piffissaq ungasinnerusoq eqqarsaatigalugu innaallagissap piumaneqarnera naapertorlugu pilersitsinissaq unammillernartoqalersinnaanera ernumassutigineqarpoq, nukissiorfinnik nutaanik pilersitsiniarneq piffissamik atuiffiusarmat, tamatumalu saniatigut pinngortitami annertuumik allannguinissamik pisariaqartitsisoqartarmat.
- Akit aamma qaffatsinneqaratarsinnaapput, taamaalilluni atuisunut nalinginnaasunut ajornartorsiutaalerluni, Islandip Universitetiani aningaasaqarnermik ilisimasalik Sigurdur Jóhannesson taama oqarpoq.
/ritzau/TT