oqalinneq

Danskit politikerit oqaaseqarumanngitsut

Danskit politikeriisa Vittus Qujaukitsup oqaaseqarneranut qanoq qisuariassanerlutik marlunngornermi ullaakkut isumaliutigaat

Vittus Qujaukitsup danskit makitaniarnerarlugit aamma naalagaaffeqatigiinnermit aniniarnermik sioorasaaruteqarluni danskit aviisianni Polikenimi oqaaseqarnera, Danmarkimi politikerit akornanni tupaallaatigineqarpoq.

Kisianni qaqutigoortumik assuarinninneq arlaannaataluunniit oqaaseqarfigiumanngilaa.

Folketingimi Nunarput pillugu ataatsimiititaliamut ilaasortat tamaasa, Sermitsiaq.AG-p marlunngornermi ullaakkut attaveqarfigai. Arlallit assigiinngitsumik pissuteqarlutik pissarsiassaanngillat, kisianni politikerit saaffiginninnermut akissuteqartut, Vittus Qujaukitsup isornartorsiuineranut oqaaseqarnissamik itigartitsipput.

- Kisianni oqallinnermut malinnaavunga, aamma kalaallit tusagassiuutaatigut, Karsten Hønge (SF) Sermitsiaq.AG-mut oqarpoq.

Atuaruk: Vittusip Danmark USA-lu sioorasaarpai

Kalaallit Nunaat nammineq tunngaviusumik inatsiseqalissappat, naalagaaffimmit tapiissutit unitsinnissaat ullulerneqartariaqartoq, Hønge sapaatip-akunnerani kingullermi KNR-imut oqarpoq. Kisianni maanna Politikenimi allaaserisaq pillugu oqaaseqarumanngilaq.

Socialdemokratit Nunarput pillugu ataatsimiititaliami ilaasortaatitaa, Karin Gaardsted, maanna isummani oqaatigerusunngilaa. Socialdemokraatit Qujaukitsup isumaa pillugu qanoq qisuariassanersut, taassuma partiip aqutsisui oqaloqatigeqqaarniarpai.

Danskit aviisiat Politiken aamma politikerit isornartorsiuinermut akissuteqartinniarlugit ajornartorsiorsimavoq. Ministeriuneq Lars Løkke Rasmussen (V) oqaaseqarumanngivippoq, kisianni nunanut allanut ministeri Anders Samuelsen (Liberal Alliance) mailikkut akissuteqartinnissaa iluatsinneqarpoq.

- Isornartorsiuineq (...) tulluarsorinngilara imaluunniit pitsaasorinngilara, taanna aviisimut allapppoq, nangillunilu:

- Vittus Qujaukitsup makitaniarnermik isumaqarluni oqaaseqarnera ilisarisinnaanngilara. Namminersorlutik Oqartussat peqatigalugit Pituffik aamma Camp Century pillugit suliat pingaarutillit naalakkersuisut qitiutikkaat, erseqqissumik oqaatiginikuuarput, aamma naalakkersuisut tunngavianni ilaavoq. Qanimut kinguneqartussamik suleqatigiinnerput ingerlateqqissavarput, aaqqiissutissat ukkanneri attatiinnarlugit.

Sermitsiaq.AG-p suliaq misissorpaa.

Powered by Labrador CMS