Danskit partiivi illersornissamut aningaasat Nunatsinni atornissaannut piareersimasut
DF aamma De Radikale illersornissamut saniatigut aningaasaliissutaasut ilaat Kalaallit Nunaannut atornissaannut piareersimapput. Innuttaasunut iluaqutaanissaat Radikalenit piumasarineqarpoq.
Danskit naalakkersuisui Dansk Folkeparti, De Radikale aamma Socialdemokratiet illersornissaqarfimmut saniatigut 1,5 milliardit koruuninik atuiniarlutik ppassaq malunngornermi isumaqatigiissuteqarput.
Minnerpaamillu partiit isumaqatigiissuteqaqataasut marluk Kalaallit Nunaanni aningaasanik taakkuninnga atuinissamut piareersimapput. Dansk Folkeparti aningaasat amerlanerpaartaat – milliardit missaanniittut – timmisartunik malersuutinik 27-nik F35-inik pisiarineqartussatut pilersaarutigineqartunut pisinissamut aningaasat naammannissaasa qulakkeernissaannut atorniarpaat. Kisianni tamatuma saniatigut Issittumi aamma aningaasanik atuisoqassaaq.
Upalungaarsimaneq
- Naalagaaffeqatigiinneq paarilluarneruniarlugu illersornissaqarfiup Kalaallit Nunaanniititaqarneranut aningaasaliinerusariaqartugut, Dansk Folkeparti isumaqarpoq, partiip illersornissamut oqaaseqartartua, Jeppe Jakobsen, Sermitsiaq.AG-mut taama oqarpoq.
- Aningaasat SAR-imik upalunaarsimanerup pitsanngoriarnissaanut atorneqarsinnaalluartut eqqarsaatigaara.
De Radikalenit aningaasat aamma Nunatsinnut atorneqarnissaat piareersimaffigineqarpoq.
- Taavani pisariaqartinneqartut amerlapput, taamaammat 1,5 milliardit ilaat tassani atorneqarnissaat tulluarpoq, Martin Lidegaard Sermitsiaq.AG-mut oqarpoq.
Aningaasaliissutit nutaat aatsaat 2023-imi atorneqassapput.
- Piffissamilu tassani suli pisariaqartitat amerlanerussapput, taanna oqarpoq.
Sakkussiornerunermuunngitsoq
- Kisianni saniatigut aningaasaliissutigineqartut Issittumi sakkussiornerulernermut tapiissutigineqannginnissaat pingaaruteqarpoq, kalaallinut iluaqutaasariaqarput.
Aningaasat pingajorarterutaasa missaat Issittumi atorneqarsinnaapput.
- Upalunaarsimanerup nukittorsarneqaarnissaa pisariaqartinneqarpoq, annaasiniarnermut aamma silap pissusianut avatangiisinullu tunngatillugu. Isumannaallisaanermi aamma silap pissusianik ilisimatusarneq nukittorsassavarput, immaqa aamma Issittumi Sakkutooqarfik umiarsuarnik aalaakkaasunik nukittorsarneqarsinnaavoq.
Mittarfissuarnut nukittorsaaneq
Illersornissamut ilisimasallip Henrik Breitenbauchip Kalaallit Nunaata imartaa aamma Atlantikup avannarpasissortaani nakkutilliinerup pitsanngorsarnissaa pisariaqartinneqartoq oqaatigaa.
- Qaammataasatigut nakkutilliineq aamma imartat assitalersornissaat aamma pisariaqartinneqaartut ilagaat.
Siorna ukiakkut USA-p nalunaarutigaa, nunap illersornissaqarfiata kalaallit mittarfeqarfiini sakkutuunut sakkutuujunngitsunullu atorneqarsinnaasunik aningaasaliinissamut soqutiginnilluni.
Danskit illersornissamut aningaasaliissutaasa ilaat taamatut atorneqarsinnaanerat, Martin Lidegaardip takorloorpaa.
- Mittarfiit aningaasaleeqataaffigineqarnerinut aningaasat atorneqarsinnaapput, taamaalilluni suliniut annerulersinnaalluni. Pingaarnertut sakkutuujunngitsunut atorneqassapput, kisianni illersornissaqarfimmut periarfissatut atorneqassallutik, taanna oqarpoq.