Danskit naalakkersuisui peqqinnissaqarfimmut saniatigut 5 milliardinik aningaasaliisut

Danmarkimi naalakkersuisut peqqinnissaqarfimmut aamma kræftertunut suliassaqarfimmut amerlanerusunik aningaasaliissuteqarput.

Odense Universitetshospitalimi kræfterlutik napparsimasut maanna angerlarsimaffimminni nammineerlutik kemomik katsorsarneqarsinnaanngorput. IV-pumpemik angallanneqarsinnaasumik taaneqartartumik tunineqartassapput. John katsorsaanermik misiliisut ilagaat.

Peqqinnissaqarfimmut nutaamik aningaasaliissuteqarnermi danskit naalakkersuisui peqqinnissaqarfimmut ukiumut ataavartumik 5 milliardit koruuninik ilassuteqartarniarput.

Ministeriuneq Mette Frederiksen (S) marlunngornermi ullaakkut tusagassiortunik katersortitsinermi taama oqaluttuarpoq, tassanilu aamma nunanut allanut tunngasunut ministeri Lars Løkke Rasmussen (M) aamma nunamut namminermut peqqissutsimullu ministeri Sophie Løhde (V) peqataapput.

- Peqqinnissaqarfimmi sorpassuit ingerlalluarput, Mette Frederiksen tusagassiortunik katersortitsinerup aallartinnerani oqarpoq, kisianni nangippoq:

- Aamma annertuunik unammilligassaqarpoq. Taamaammat Danmarkimi peqqinnissatsinnut annertuumik aningaasaliissuteqarniarluta aalajangerpugut.

Qaammatini arfinilinni kingullerni maani nunatsinni misiliutitut Danmarkimi kræftertunut katsorsaasarnerup assinganik neqerooruteqartoqarpoq. Napparsimasup inuuneranut sivitsorsaataasumik katsorsarneqarnissaminut itigartinneqarnerata kingorna tamanna pivoq, katsorsaasarneq taanna taamanikkut Kalaallit Nunaanni neqeroorutigineqarsimanngilaq.

Danmark aamma tatineqartoq

Danskit peqqinnissaqarfiat nunatsinni peqqinnissaqarfik assigalugu ukiuni kingullerni sulisunik amigaateqarnermik aamma sivisuumik utaqqisoqartarneranik tatineqarpoq.

Taakku 5 milliardit koruunit peqqinnissaqarfimmut aningaasaliissutaareersut saniatigut aningaasaliissutaapput. Taakku 2030-p tungaanut ilanngukkiartorneqassapput.

Sanilliullugu Danmarkimi Naatsorsueqqissaartarfik naapertorlugu peqqinnissaqarfik 2022-mi katillugit 265,7 milliardit koruuninik akeqarsimavoq.

- Ullumikkut peqqinnissaqarfitsinnik annertuumik kivitsisinnaanerput, danskit aningaasaqarnera naatsorsuutigisamit pitsaaneruneranik pissuteqarpoq, Mette Frederiksen oqarpoq.

Aningaasaqarnermut Nassuiaat danskit naalakkersuisuisa sapaatip-akunnerata siuliani saqqummiussaata, danskit aningaasaqarnerisa naatsorsuutigisamit pitsaaneruneranik takutitsineranut taanna innersuussivoq.

Naalakkersuisut aamma ukioq manna aappaagulu kræftertunut suliassaqarfiup aaqqiissuteqarfiginissaanut immikkoortitsiniarput.

Aarhus Universitetshospitalimi inalukkamikkut kræfteqartut katsorsarneqarnissaminnik sivisuallaamik utaqqisarsimasut DR Nyhederimi oqaluttuarineqarnerisa kingorna, peqqissutsimut ministerip Sofie Løhdep aaqqiissuteqarnissamut pilersaarut marsimili saqqummiuppaa.

Kræftip siaruarsimaneranik napparsimasut ilaannut kinguneqarpoq, taamaalillutik katsorsarneqarsinnaajunnaarsimallutik.

Kingusinaarluni katsorsaaneq

Taamatuttaaq siorna kræfterlutik nakorsiartut sisamaannit amerlanerusut piffissap aalajangiunneqartup iluani katsorsarneqarsimanngitsut, Danmarkimi Peqqissutsimut aqutsisoqarfiup ukiumoortumik nalunaarusiaanit ataasinngornermi saqqummiunneqartumi kisitsisit takutippaat.

- Kræftimik eqqugaasut napparsimanerminnik aniguisartut amerlassusaat appariartorput, nunamut namminermut peqqissutsimullu ministeri Sophie Løhde oqarpoq.

- Sisamaasunit pingasuinnaat piffissap killigitinneqartup iluani katsorsarneqartarput. Kisitsisit aatsaat taama appasitsigipput. Tatiginninneq pilerseqqissavarput.

Danskit naalakkersuisui aamma 2025-mit ukiumut 600 millionit koruuninik tallimassaanik kræftertunut sulianut aningaasaliissuteqarnissamut immikkoortitsivoq.

Naalakkersuisut naapertorlugit kræfteqartunut suliassaqarfiup siunissamut qulakkeerinnillunilu katsorsaanerup ineriartortinneqarnissaanut atorneqassapput.

Powered by Labrador CMS