Danskit-kalaallit isumaginninnermi polikkiat pillugu ataatsimeersuarnermi peqataaqarluartoq

Isumaginninnermi politikki pillugu Odensemi ataatsimeersuartoqarnerani naammassineqaqqammersumi uparuarneqartut ilagaat, Naalagaaffeqatigiinnerup inunnut atugarliortunut naapertuutinnginnera. Soqutisallit politkkerillu arlallit kalaallit Danmarkimi najugaqarlutik atugarliortut ajornartorsiutaat aaqqiiffissarsiorniarlugit oqalliseqataasimapput.

SAND-imit sinniisuutitat tallimat. Saarlermi saamillermiit takuneqarsinnaapput Jensine Kristensen, Dorrit Schmidt, Arthur Lennart Kristiansen aamma Brian Døssing. Tunorlermiippoq SAND-imi ineriartortitsinermut siunnersorti Tobias Hansen.

Danskit-kalaallit isumaginninnermi politikkiat pillugu marlunngornermi ullaakkut ataatsimeersuarnermut peqataaniarlutik takkuttut 160-iusut Odensemi Nordatlantiske Husip eqqaani akerliussutsimik takutitsiffigineqarput.

Akerliussutsimik takutitsisut kalaallit meerartaasa Danmarkimi pinngitsaaliissummik arsaarinnissutigineqartarnerisa ajornartorsiutaanera erseqqissaassutigerusussimavaat.

Ataatsimeersuarneq Danmarkimi kalaallit illuinit sisamaasunit aaqqissuunneqarsimavoq. Kalaallit Danmarkimi najugaqarlutik atugarliortuullutillu mianernartuusut ajornartorsiutaat assigiinngitsut kalaallit illuinit aaqqiiffigineqarusuttorujussuuppput.

Odensemiittumi Kalaallit Illuanni pisortaanerup Nauja Biancop siusinnerusukkut erseqqissaassutiginikuuaa, assigiinngitsunik suliaqartut suleqatigiinnerat ullumikkumut sanilliullugu suli pitsaanerulersinneqarsinnaasoq, ataatsimeersuarnerlu suleqatigiinnermut pitsanngorsaaqataassasoq.

Isumagisassat tamarmik isumagineqarsimasut

Ataatsimeersuarnermi oqartussaqarfinnit kalaallinik atugarliortunik sullissisartunit assigiinngitsorpassuarneersut saqqummiussipput. Kalaallit illuinit aamma saqqummiussisoqarpoq. Kalaallit folketingimi ilaasortaatitaat marluk Aki-Mathilda Høegh-Dam aamma Aaja Chemnitz aamma peqataapput. Kalaallit Nunaanni Danmarkimilu kommuninit, Socialstyrelsenimit, Naalakkersuisunit allaniillu ajornartorsiutinik pineqartunik sullissisartunit sinniisuutitat aamma peqataapput.

Ataatsimeersuarnermi peqataasut suliassaqarfimmi tamarmiusumi nukittorsaaniaraanni qanoq iliuuseqartoqarlunilu iliuuseqartoqartariaqartoq pillugit kiisalu inuit ataasiakkaat arlaannik pissuteqartumik ikiorserneqarnissamik pisariaqartitsisut inuunerisa qanoq oqinnerulersinneqarsinnaanerannik pitsaanerulersinneqarsinnaanerannillu siunnersuuteqarnissamut periarfissinneqarput. Saqqummiussisut assigiinngitsut saqqummiussaat soqutiginartut piffissami qaninnerusumi Odensemi Kalaallit Illuata nittartagaatigut takuneqarsinnaalissapput.

Oqaaseqartut assigiinngitsut ataatsimiittoqarnerani ilisimasaminnik avitseqateqarput. Mille Schiermacher Ilisimatusarfimmi ph.d.-nngorniartuusoq toqqaannavissumik oqaaseqarpoq:

- Naalagaaffeqatigiinneq inunnut atugarliortunut naapertuutinngilaq. Ajornartorsiutit aaqqiiffigineqarniarnerat soorunami aningaasanik naleqarpoq, ajornartorsiutilli aaqqiiffigineqannginnerat suli akisunerussaaq.

- Suliniuterpassuit pitsaasut ajunngitsumillu isumallit iluamik nalilersorneqartanngillat, suna ajunngitsumik ingerlanersoq sunalu ajortumik ingerlanersoq naluarput. Aamma angerlarsimaffeqanngitsut qanoq amerlatiginersut naluarput. Ajornartorsiutit aaqqiiffigineqassapput asulilu allamut ingerlateqqiinnarneqartassanatik, taanna erseqqissaavoq.

Mille Schiermacherip aamma oqaatigaa, susassaqarfimmut aningaasarpassuit immikkoortinneqartartut kukkusumik atorneqartartut.

Angerlarsimaffeqanngitsuuneq oqaluuserineqartoq

De Hjemløses Landsorganisation (Angerlarsimaffeqanngitsut nuna tamakkerlugu kattuffiat) tallimanik aallartitaqarluni peqataatitaqarpoq. SAND-imi kalaallit gruppiat Socialstyrelsenimik suleqateqarpoq, siunnersuisoqarniartillugulu atorneqartarlutik.

- Oqaluunneqarata oqaloqatigineqartarnerput assut nuannerpoq, Jensine Kristensen SAND-imit aallartitaasoq oqarpoq.

Folketingimi ilaasortaq Karsten Hønge SF

Folketingimi ilaasortap Karsten Høngep (SF) ataatsimeeqatigiittoqarnissaanik aaqqissuussisoqarsimanera nersualaarpaa. Taanna ilaatigut isumaqarpoq, kalaalerpassuit anmarkimi atugarliornerannut pissutaasoq Kalaallit Nunaannit pisuusoq.

- Kalaalerpassuit Kalaallit Nunaanniit Danmarkimut nuuttarput, Kalaallit Nunaanni sorsuutissaqarpallaarnertik pissutigalugu Danmarkimut nuuttaramik. Inuuniarneq ajorpallaaqimmat qimaallutik nuuttarput. Kalaallit Nunaanni ajoraluartumik inuttut naligiinngilluinnartumik ajorluinnartumillu inuusoqarpoq.

Arlallit aamma oqaatigaat, Kalaallit Nunaanni pissutsit oqaluuseritinnagit Danmarkimi pissutsit oqaluuserineqarsinnaanngitsut.

Powered by Labrador CMS