piumasaqaatit
Danskit kalaallillu Qalasersuaq pillugu akisussaaffeqarusunneq pillugu Canada: Ajorinngilarput
Danmarki Kalaallit Nunaallu assigalugi Canada Qalasersuup ilaanik akisussaaffeqarusuppoq. - Eqqissisimasumik sulisoqassaaq, ambassadøri oqarpoq
Qalasersuarmi 895.000 kvadratkilometerimik Kalaallit Nunaat Danmarkillu akisussaaffeqarusunnerat Canadarmiunut ajunngitsumik tiguneqarpoq.
Canada Qalasersuarmik aamma annertuumik akisussaaffeqarusuppoq, akisussaaffigineqarusuttorlu ilaa Kalaallit Nunaannit Danmarkimiillu aamma akisussaaffigineqarusuppoq.
Canadap Danmarkimi ambassadøria André François Giroux oqarpoq.
- Kalaallit Nunaata Danmarkillu akisussaaffigerusutaata immikkoortuani Canada aamma akisussaaffeqarusuttoq ilisimavarput. Akerleriiffiuneqarsinnaasutut ilaannit isiginiarneqarpoq. Taamaanngilarli. Suliariaaseq tassa taamaappoq, oqarpoq.
Akisussaaffigineqarusuttut FN-imit aalajangerneqassapput. Ilisimatuussutsikkut tunngavilimmik akisussaasoqassasoq FN-imit piumasarineqarpoq.
Nunat FN-ikkut isumaqatigiissinnaanngippata nunat imminnut isumaqatiginninniartinneqassapput.
Canada kiisalu Danmarkip naalagaaffia imminnut Qalasersuaq pillugu akerleriilernissaat André François Giroux-mit naatsorsuutigineqanngilaq.
- Soorunami siunissami susoqassanersoq takorloorsinnaanngilara. Isumaqatigiinngittoqalissappat Canadap Danmarkillu isumaqatigiinngissut anigorniassavaat ataatsimoorlutik inatsisit malillugit, ambassadøri oqarpoq.
895.000 kvadratkilometerimik akisussaaffeqarniarneq pillugu danskit aallartitaat FN-imut nassiussipput ataasinngormat.