Danskit inuusuttaasa Kalaallit Nunaat nutaaliaasoq ilisimanngilaat

Danmarkimi atuartut Kalaallit Nunaanni pinngortitaq aamma silap pissusia pillugu ilisimasaqarnerupput. Naalagaaffeqatigiinneq kiisalu Kalaallit Nunaat nutaaliaasoq pillugu inuusuttut ilisimasaqannginnerupput.

Kalaallit Nunaat nutaaliaasoq pillugu danskit inuusuttut akornanni ilisimasat annikipput. Danskit ilinniartitaanermut ministeriaqarfiata 9. klassit aamma ilinniarnertuunngorniarfinni ilinniartut akornanni misissuinerata tamanna takutippaa.

Kalaallit Nunaat pillugu tunngaviusunik piviusunut tunngatillugu pitsaanerusumik inissisimapput, tassani pinngortitaq aamma avatangiisit pillugit apeqqutit eqqortumik akisarpaat.

Naalagaaffeqatigiinnermi Kalaallit Nunaannut tunngatillugu ilisimasat annikinnerpaapput. Tassani atuartut apeqqutit 51 procentii kisiisa eqqortumik akisarpaat, tunngaviusumik apeqqutini 67 procentiullutik.

Kalaallit Nunaannut nutaaliaasumut ilisimasanut kiisalu nunap kultuurianut aamma oqaluttuarisaaneranut, atuartut ilisimasaat annertunngillat.

Nanook aamma Julie

Apeqqutinut aalajangersimasunut assersuutinut, Kalaallit Nunaata qaasuitsup killeqarfiani avannarlermi inissisimanera, erfalasup qanoq isikkoqarnera, aalisarnerup pingaarnertut inuussutissarsiutaanera aamma Folketingimut ilaasortat marluunerat, inuusuttut affaasa eqqortumik akisarpaat. Inuttaasut tamarluinnangajammik sinerissami najugaqarnerannut, kaffisortitsisarneq, illoqarfiit akornanni timmisartumik imaluunniit umiarsuarmik angalasoqartarnera aamma Kalaallit Nunaanniittut amerlanersaat danskisut innuttaassuseqartut inuusuttut affaasa inorlugit eqqortumik akisarpaat.

Immaqa quinalaarsinnaavoq, Nanook kalaallit nipilersortartuusut amerlanerussuteqartut eqqortumik akisarmassuk. Akerlianik Julie Berthelsenip nipilersortartup kalaaliunerata affaanit ikinnerusut ilisimavaat.

Misissuineq 2018-imut aaningaasaqarnermut inatsimmut atatillugu ingerlanneqarpoq.

Powered by Labrador CMS