Danskit aningaasanut inatsisaata kalaallit inuusuttut ilinniagaqarnissaat unitsippaa
Umiarsuup umiartornermik sungiusarfiup Georg Stagep inissat qulingat kalaallinut ilinniartussanut inniminnertarpaa, kisianni umiarsuaq 2022-mut aningaasanut inatsimmi ilanngaaffigineqarpoq, tamannalu aammattaaq kalaallinut ilinniartunngortussanut eqquivoq, taakku affaannanngortussanngormata.
Ukiuni kingullerni pingasuni umiarsuaq umiartornermik sungiusarfik Georg Stage kalaallinik ilinniartunik aqqaneq-marlunnik ukiumut ilaasoqartarpoq angalanermut ukiumut marluusuni. Kisianni Danskit Naalakkersuisuisa 2022-mut aningaasanut inatsisissamut siunnersuutaanni taamaallaat ukiumut angalanermut ataatsimut aningaasanik immikkoortitsisoqarpoq. Tamatuma kingunerisaanik ilinniartut amerlassusiat affaannanngussaaq, taamaattumillu kalaallinut ilinniartunut taamaallaat arfinilinnut ukiumut inissaqarluni.
Aviisi Sermitsiaq allappoq.
- Tamanna ajorluinnarpoq, nalunngilarpummi umiarsuaq umiartornermik sungiusarfik Georg Stage inuusuttunut periarfissarpassuarnik ammaassisartoq. Ilinniartuutivut sulisorineqarusuttartorujussuupput, ingammik aalisarnermi aamma Royal Arctic Linemi, taamatut oqarpoq Georg Stagemut pisortaq, Asser Amdisen.
Kalaaleq ilinniartoq siulleq umiarsuarmi umiartornermik sungiusarfimmi Georg Stagemi 1962-mi ilinniartunngorpoq, 1964-illu kingornatigut angalanerni tamani kalaaleqartuaannarluni. Katillugit kalaallit 350-it Georg Stagemi angalaqataasimapput.
Umiarsuarmi umiartornermik sungiusarfimmi ilinniarneq kalaallinut akeqanngilaq, tamanna Lichtenbergs Fondimit akilerneqartarmat namminersorlutik oqartussat suleqatigalugit. Taakku aammattaaq Kalaallit Nunaannit Danmarkimut angalaneq uterlugulu akilertarpaat. Tassani ilinniarneq SU-mit tapiiffigineqartussaavoq.
Aviisimi Sermitsiami atuarnerusinnaavutit. Aviisi uani pissarsiariuk: