meeqqat inuusuttullu

Dansk Folkepartip namminersorluni oqartussaqarneq utertinniarpaa

Akerlianik Enhedslistenip tatigaa Kalaallit Nunaata isumaginninnikkut ajornartorsiutini nammineerluni qaangerniarsinnaagai

Dansk Folkepartip Kalaallit Nunaannut oqaaseqartartua Søren Espersen

– Namminersorlutik Oqartussat kommunillu meerarpassuit annertuumik sumiginnagaasimasut ikiussallugit piumassuseqarunaraluarput, Kalaallit Nunaatali tamanna saperpaa - sulisussaqarnikkut aningaasatigulluunniit. Taamaattumik naalagaaffiup isumaginninneq, namminersornerullutik oqartussat 1980-imi tigusimasaat, tigugallartariaqarpaa. Oqartussaaffeqarfik tamanna Danmarkip akisussaaffigivippaa, pissutigalugu kunngeqarfik tamaat sinnerlugu FN-ip Meeqqanut isumaqatigiissutaa atsiorsimagatsigu.

Taamatut Sermitsiamut oqarpoq Dansk Folkepartip Kalaallit Nunaannut oqaaseqartartua Søren Espersen, taannalu meeqqat atugarisaat, meeqqat illersuisuata Aviâja Egede Lyngep Avannaanut angaalanerminit nalunaarusiamini allaaserisimasai, pillugit Folketingimi apeqqarissaarluni oqallitsitsiniarpoq.

Akuerineqarsinnaanngilaq

Søren Espersen isumaqarpoq Naalakkersuisut suleqatigalugit maannakkorpiaq iliuuseqartoqassasoq, kalaallilli politikerii iliuuseqarsinnaanngippata isumaginninneq Danmarkip tigugallartariaqarpaa.

– Danmark oqartussaaffeqarfimmut tamatumunnga aningaasanik amerlanerusunik tunniussisinnaagaluarpoq Kalaallit Nunaat, aningaasaqarniarnermigut ajalusuulersoq, ikiorniarlugu, taamaasiorumanngilagulli. Qanoq iliuuseqartoqarani mianersoqqussuterpassuusimasut amerlavallaaqaat, Kalaallillu Nunaat utaqqisinnaajunnaarparput, Søren Espersen oqarpoq.

Taassuma siunnersuutigaa isumaginninnermik oqartussaaffik Danmarkimut utertinneqarallassasoq, akerlianillu immikkut ilisimasalinnik Kalaallit Nunaannut aallartitsissaaq ajornartorsiutinik maanna atuuttunik, meeqqat illersuisuisa angalanermi nalunaarusiamini allaaserisaanik, suliarinnikkiartortunik.

Siunnersuut Enhedslistenip itigartippaa

– Takorloorpara qallunaat naalakkersuisuisa Naalakkersuisut suleqatigalugit immikkut ilisimasalinnik aallartitsissasut, tassaasunik nakorsat, peqqissaasut isumaginninnermillu suliallit, ajornartorsiutinik erloqinartunik, meeqqat illersluisuata allaaserisaanik, saliiartorlutik. Oqaatsit kulturilu pineqanngillat meeqqat kaallutik innartartut qaarsillartinnissaat, imaluunniit meeqqat kinguaassiuutitigut atornerlunneqartuartut illersornissaat, Søren Espersen oqarpoq.

Dansk Folkepartip immikkut ilisimasalinnik aallartitsinissamik namminersorlunilu oqartussanerup utertinnissaanik siunnersuutaa Enhedslistenip itigartippaa.

Allaaserisaq tamaat Sermitsiami sapaatip akunnerani saqqummersumi atuaruk. Aviisi aamma pisiarisinnaavat uani:

Powered by Labrador CMS