Dannebrog sapaatiuppat Savalimmiunut tikissagunarpoq

Dronningi Savalimmiunut tikissimavoq, kunngikkormiulli umiarsuaat suli tikinngilaq. Umiarsuup sapaatiuppat tikinnissaa naatsorsuutigineqarpoq, dronningip taamaalilluni aasaanerani pilersaarutaasutut angalanissani ingerlassinnaassavaa.

Dronningip Savalimmiunut pisortatigoortumik tikeraarnermini kunngikkormiut umiarsuaat Dannebrog taamalu naalagaaffimmi qullersatut inigisartakkani ullualunni atunngittoortariaqarpaa.

Tamatumunnga pissutaavoq, kunngikkormiut umiarsuaata maskiinatigut ajoquteqarnera pissutaalluni Savalimmiunut siusinnerpaamik sapaatiuppat tikissinnaanera.

Lars Hovbakke Sørensen kunngikkormiut oqaluttuarisaanerannik ilisimasalik naapertorlugu, dronningi kunngikkormiullu allat nunanut allanut angalagaangata Dannebrog pingaaruteqarluinnartarpoq.

- Dronningip angalagaangami Dannebrog nammineq inuttut inigisamisut atortarpaa. Pigisai umiarsuarmiipput umiarsuarlu najugaqarfigisarlugu, taamaalilluni angalanermini angerlarsimasutut misigisarluni, taanna oqarpoq.

Tikeraarnera sisamanngornermi aallartippoq ataasinngornerullu tungaanut atuutissalluni.

Powered by Labrador CMS