Danmark: Naartusut maanna akiuussutissalerneqarsinnaanngorput
Paasissutissanik allallu misilittagaannik misissuisoqareersoq, Danmarkimi naartusut milutsitsisullu akiuussutissalersorneqarsinnaanerat ammaanneqarpoq. Kalaallit Nunaanni tamanna aamma atuutissanersoq suli nalunarpoq.
Danmarkimi naartusut milutsitsisullu coronavirusimut maanna akiuussutissalersorneqarsinnaanngorput.
Danmarkimi Peqqissutsimut Aqutsisoqarfik pingasunngornermit tusagassiorfinnut nalunaaruteqarluni taamatut ilisimatitsissuteqarpoq.
Naartusut milutsitsisullu akiuussutissalersorneqarsinnaanerat maannamut ajornarsimavoq. Pissutsit immikkut illuinnartut atuutsillugit taamaallaat akiuussutissaliisoqarsinnaasimalluni.
Nunanilli allanit paasissutissat nutaajunerusut misilittakkallu misissorneqareernerisigut Danmarkimi Peqqissutsimut Aqutsisoqarfik akiuussutissalersuinissamut maanna akuersissuteqarpoq.
Mianersornissamut tunngavik
Danmarkimi Peqqissutsimut Aqutsisoqarfiup inassutigaa, qaammatip aappaani pingajuaniluunniit naartusut mianersornissamut tunngaveqarluni akiuussutissalersorneqarnissaat. Nakorsamilli isumaqatigiissuteqarnikkut qaammaammi siullermi naartusut akiuussutissalerneqarsinnaapput.
Meerartaarnissamik pilersaaruteqaraanni imaluunniit meerartaarusulluni suliaritikkaanni akiuussutissalertinnissamut neqeroorummut akuersissuteqarnissaq aqutsisoqarfimmit inassutigineqarpoq.
Nalunaarummi takuneqarsinnaanngilaq, Kalaallit Nunaanni peqqissutsimut oqartussatnaartusunut milutsitsisunullu tunngatillugit taamatut inassuteqarnermut qanoq isumaqarnersut, amerlanertigulli Danmarkimi Peqqissutsimut Aqutsisoqarfimmit inassuteqaatit malinneqartarput.
Sermitsiaq.AG-mit paasiniarneqarpoq, Danmarkimi malittarisassat Kalaallit Nunaanni aamma atuutissanersuq.