Danmarkip piumasaa malinnagu Savalimmiut suliassaqarfimmik tigusipput
Nunap assiginik nunalu pillugu misissuinermut tunngasunik, kiisalu immap assiginik suliassaqarfik akisussaaffittut nunap angerlaatissagaa lagtingimi amerlanerussuteqartut akuersissutigaat. Danskit oqartussat kissaatigigaluarpaa Savalimmiut akisussaaffimmik angerlaassinissaminnut utaqqimaaqqaassasut. Utaqqeqqusinermut tunngavilersuutigineqarpoq akisussaaffiup ilaa illersornissamut tunngassuteqarnersoq suli qulaajarneqanngimmat.
Nunap assigi pillugit oqartussaaffik pillugu ataasinngornermi decembarip qulingani pingajussaaneerinninnermi, lagtingimi ilaasortat 23-t akuersipput tallimallu akerliullutik.
Taamaasilluni Savalimmiut nunap assiginut oqartussaaffik angerlaattussanngorpaat, naak Nukissiuuteqarnermut, Pilersuinermut Silallu pissusaanut tunngasunut ministeria isumaqaraluartoq inatsisissatut siunnersuutip naammassinissaa lagtingimi utaqqissunneqartariaqartoq.
Oqaluuserisassap aappassaaneerneqarnerani paasinarsivoq Nukissiuuteqarnermut, Pilersuinermut, Silallu pissusaanut tunngasunut ministeriaqarfiup oqartussaaffimmik tigusinissap utaqqissunneqarnissaa marlussoriarluni innersuussutigisimagaa. Siullermik novembarip 28-ani aappassaanilu decembarip pingajuani. Danskit savalimmiullu oqartussaasuisa akornanni mailikkut attaveqatigiinnermit tamanna pissarsiarineqarpoq.
Nukissiuuteqarnermut, Pilersuinermut Silallu pissusaanut tunngasunut ministeria isumaqarpoq ataatsimiititaliap suliamik suliaqartup suliaminik naammassinneqqaarnissaa utaqqineqaqqaassasoq. Ministeriep kissaatigaa qulakkeerneqaqqaassasoq nunap assiginut oqartussaaffimmi suliassat nunanut allanut tunngasunut, illersornissamut sillimaniarnissamullu politikkimut kalluaataassanngitsut.
Pisariaqanngilaq
Savalimmiut lagmandiat, Aksel V. Johannesen, (Javnaðarflokkurin/Socialdemokraterne), lagtingimi nunanut allanut tunngasunut ataatsimiititaliamut Danmarkip saaffiginninnera pillugu allakkatigut decembarip sisamaanni paasissutissiivoq.
Lagmandi allappoq oqartussaaffimmik tigusereernermi nalornisigineqartut suliarineqarsinnaasut isumaqarluni. Ataatsimiititaliarmi oqartussaaffimmik tigusinissamut tunngatillugu suliaqarmat.
Oqartussaaffiup tigunnginnerani danskit oqartussaasui isumaqatiginninniarfigineqaqqaartariaqanngissorineqartut, lagmandi nunanut allanut tunngasunut ataatsimiititaliamut allappoq.
Danskilli oqartussaasui allatut isumaqaramik marlussoriarlutik attaveqarput.
Tigusinissaq pillugu nalorninartut
Lagmandiusimasoq maannalu lagtingimi ilaasortaasoq, Kaj Leo Holm Johannesen(Sambandspartiet) oqartussaaffimmik suli tiguneqarsinnaanngitsumik Savalimmiormiut tigusiniarsarisut aarleqqutigaa.
-Mianersortariaqarpugut, Danmarkimi sakkutooqarnermut oqartussaaffianik danskillu nunanut allanut tunngasunut politikkianik tigusinaveersaartariaqarpugut. Naluara sunarpiaq tiguniarneripput, aali nunanut allanut tunngasunut ataatsimiititaliami ilaallunga, Kaj Leo Holm Johannesen Portal.fo-mut oqarpoq.