Danmarkip Nunattalu uranimik avammut niuernissaq isumaqatigiissutigaat

Kalaallit Nunaata Danmarkillu uraninik nunatsinneersunik, iluanaarniutigalugu siunissami tunisassiarisinnaanissaannut malittarisassat isumaqatigiissutigaat.

Qallunaat nunanut allanut ministeriat Kristian Jensen naapertorlugu, isumaqatigiinneq ‘sivisujaarsuarmik oqallisigineqareerluni’ isumaqatigiissutigineqarpoq. Folketingemi Nunanut allanut tunngasunut aalajangiisartut taama marlunngornermi ilisimatitsipput.

- Isumaqatigiissutiginiarsimavarput, Kalaallit Nunaat qanoq iliorluni uranimik piiaanissamik pisinnaatitaassanersoq. Danmarkillu nunanut allanut tuniniaanermi suna akisussaaffigissaneraa, Kristian Jensen oqarpoq.

Uranisiornissami malittarisassaliuussinissamik pisariaqartitsineq pilerpoq, Kalaallit Nunaanni Inatsisartut amerlanerussuteqaqqatalaarlutik, 2013-imi uranimut naaggaarluinnarnissaq, tassa uranip akuata minnerpaaffissaata killissaa qimanneqarmat, Kalaallit Nunaannilu siunissami uranisiorsinnaanissaq akuersissutigalugu.

Illuatungeriillu isumaqatigiissuteqarnissaq kingorna sulissutigaat. Isumaqatigiissutip tunisassiat uranimiit qinngornernik ulorianartullit, peqqarniisaarnianut isumapilulinnut, kisermaassillutilluunniit naalakkersuisut sakkussiornerannut anngunneqannginnissaat qulakkeernisarsimavaat.

- Isumaqatigiissullu naammassineqarpoq. Tullinnguuttorlu tassaavoq inatsisissamut siunnersuutip marsip qiteqqunnerani saqqummiunneqarnissaa, Kristian Jensen oqarpoq.

Namminersornermut inatsisip 2010-meersup kalaallit aatsitassarsiornermit isertitat pisassarilermatigit, Danmarkip Kalaallit Nunaatalu akornanni isumaqatigiinnginneq pilerpoq.

Taamaakkaluartoq ministeriunerusimasoq Helle Thorning-Schmidt (S) taamani isumaqarpoq, Danmarkip uranimik niuernissamik mattussinissamik periarfissaqartariaqartoq, naalagaaffiup isumannaatsuunissaanik politikkimut attuumassuteqarneranik isumaqarami.

Tassami isumaqatigiissutit naapertorlugit, uranit Naalagaaffeqatigiinnerup iluaneersut Danmarkip malittarisassat uniuutsillugit siammarterneqannginnissaat akisussaaffigimmagu.

Kujataata kitaani Kuannersuarni aatsitassanik qaqutigoortunik nunarsuarmi peqarnerpaat ilaattut nalilerneqarnikuuvoq.

Taakku piiarneqassappata, uranimik aamma akoqassapput, avammullu niuerutiginissaat akilersinnaassalluni.

/ritzau/

Aamma atuaruk: Kuannersuarni piiaaffik piviusunngornissaanut qanilliallattoq