qinersineq
Danmarkip Kalaallit Nunaat aqussavaa?
KNR-TV-kkut qineqqusaartoqarnerani isiginnaartut ilaat taama apeqquteqarpoq sapaatiummat. Partiit tamarmik oqarput kalaallit nunartik nammineerlutik aqussagaat
KNR-TV-imi qineqqusaartitsinerni tallimani qineqqusaartitsineq kingulleq ingerlanneqarpoq Nuummi sapaatiummat.
Kalaallit Nunaanni politikkimi partiit suleqatigiissinnaannginnerat pissutaalluni Kalaallit Nunaat Danmarkimit aqunneqalinngiinnassanersoq apeqqutigineqarpoq.
- Kalaallit Nunaat Danmarkimit aqunneqalissannginnami? Politikkerinut isumaqatigiilersinnaanngitsunut millionerpassuarnik atuisarpugut, Nukatuaq Geislerip apeqqutini tunngavilerpaa.
Siumumit Doris Jakobsen oqaaseqaqqaarpoq.
- Nunatta inuinit Nunarput aqunneqartariaqarpoq. Kalaallit ilinniagaqarsimasut amerlanerusut atorneqartalertariaqarput tikisitsinerit ikilisarneritigut. Siumut partiinut allanut suleqateqarnissamik ammasuaannarpoq, Doris Jakobsen oqarpoq.
29-nik ukiulik Nivi Olsen Demokraatineersoq apeqqummut tulliulluni akivoq. Kalaallit Nunaat ukiuni kingullerni amerlasuuni kalaallinit aqunneqartoq oqaatigaa
- Siumumit oqaaserineqartoq oqaatigeqqaarlara. Kalaallit Nunaat kalaallinit ukiuni 35-ni kingullerni aqunneqarpoq. Nunarput maannakkut sammiveqanngitsumik ingerlanneqarpoq. Tamanna iluarsiniarlugu sukataarluta sulissuteqarpugut. Kalaallit Nunaannut tapiissutigineqartartut eqqissisaatigineqartussaanngikkaluarput, Nivi Olsen oqarpoq.
Inuit Ataqatigiinnit Múte Bourup Egede oqarpoq Kalaallit Nunaat nammineerluni aqussinnaasariaqartoq.
- Naalakkersuisut kingulliit aqutsinerluttorujussuupput. Illuatungiliuttunut tusaanngillat. IA-mit akerliliilluni oqaaseqarnerit tusaaniartarpai. Suleqatigiinnikkut Kalaallit Nunaat ingerlallualersinnaavoq, IA-p inuusuttaanni siulittaasoq oqarpoq.
Hans Enoksen, Partii Naleraq, oqarpoq politikkikkut akerleriinneq pitsaasuusoq kiisalu oqallittarnissaq pingaartillugu oqarluni.
- Nordkoreatut nunarput ingerlanneqalissanngilaq, partiip ataatsip nuna aqussanngilaa. Inuiaqatigiinni pissutsit pillugit ammasumik oqallissinnaasoqartariaqarpoq, Hans Enoksen oqarpoq.
Partiit annersaat marluk siulittaasui unnugu oqallitsinneqassapput. Partiit siulittaasui sisamanngorpat oqallitsinneqassapput tallimanngorpat qinersisoqannginnerani.