Nunasiaataaneq
Danmarkip Kalaallit Nunaannut innarliinera ilisimatuumit misissorneqarpoq
Kalaallit Nunaanni pinngitsaalisaalluni qallunaanngorsagaasimasunik Anne Kirstine Hermann ujaasivoq
Kalaallit kinguaariit kingulliit danskisut innuttaasutut ilanngutivinnissamut politikkimik 1945-miik 1960-ikkut nalaanni misigisaqarsimasut oqaaseqartinneqartariaqalerput, oqaluttuaasa tammarneqannginneranni. Taama isumaqarpoq ilisimatusartoq atuakkiortorlu Anne Kirstine Hermann, taamaasillunilu inuit eqitserutitsinermik politikkimik, nuutsitaanermik, meeraanermi misileraatigineqarnermik inatsisitigulluunniit ataataqanngitsunik ujarlerpoq.
- Danmarkimi suli inoqarpoq nunasiaateqarsimasutut imminnut isigiumanngitsunik. Ajornartorsiutaavorlu pisimasut pillugit takunnikkumanngissuseqarneq, pingaaruteqarporlu oqaluttuat taakku saqqummiunneqarnissaat, Anne Kirstine Hermann tusagassiutinut nalunaarummi oqarpoq.
- Kalaallit kinguaariit danskit Kalaallit Nunaannut politikkiannik sakkortunerpaamik misigisaqarsimasut maanna utoqqalipput immaqalu aamma peerutereerlutik, taakkualu oqaluttuassartaasa kingusinaannginnermi katersorneqarnissaat pisariaqarpoq, Anne Kirstine Hermann oqarpoq.
Nuutitsinerit
Anne Kirstine Hermann Ph.d. iuvoq, antropologi aamma tusagassiortoq Nuummilu KNRimi sulisimalluni. Carlsbergfondenimit aningaasaliisoqarneratigut, Kalaallit Nunaata nunasiaataanermiit, sorsunnersuup aappaata kingorna Danmarkimi amtitut inissisimalernisaata nalaani pisunik atuakkiulerpoq. Naalagaaffiit Peqatigiit New Yorkimi allagaatinut toqqorsivianni Kalaallit Nunaata Danmarkimut ilanngunneqarnerani politikkikkut pisimasut piffissami kingullermi misissuiffigai.
Naalagaaffiit Peqatigiit isumaqatigiinniarfigineqarneri ilutigalugit danskit Kalaalllit Nunaanni aaqqissuusseqqipput, tamakkulu kinguneraat inuit nunaqarfinniit illoqarfinnut nuutsinneqarmata, ilaatigullu pinngitsaalillugit nuutsinneqartarlutik, taamatut pinermi eqitserutitsinermik politikki atorneqarluni. Aaqqissuusseqqinnernilu aamma meerarpassuit angajoqqaavinit peersinneqarlutik aallartinneqarput aamma misileraatigineqarlutik, taakkulu Anne Kirstine Hermannip KNR Radioaviisimi aamma aviisimi Poltikenimi oqaluttuarisimavai.
Oqaluttuat tammannginnissaat anguniarpaa
Maanna itisiliinerulluni sammisaqarusuppoq, Danmarkimit pinngitsaaliinerit naapertuilluanngitsuliornerillu pillugit oqaluttuat Kalaallit Nunaanni toqqortaatigineqartut tusarusuppai. Soorlu najugatoqqaniit illorsuarnut nutaalianut nuutsitaanermik misigisaqartunit, Kalaallillu Nunaata “qallunaanngorsangaanerata” malitsigisaanik inuit kalaallisut oqaloqqusaanatik qallunaatuinnaq oqalunnissamik pinngitsaaliisarnernit misigisaqartunit.
- Qanorluunnit Danmarkimut Kalaallit Nunaannullu isumaqartoqaraluarpat, pingaaruteqarpoq ukiuni taakkunani pisut aalajangiisuulluinnartut danskit kalaallillu kinguaassaasa paasissagaat, nunaqqatitta misigisimasaat imaluunniit iliuuserisimasaat. Taamaattumik assorujussuaq neriuuteqarpunga, danskit politikkiata kingunerisaannik pinngitsaalisaanermik naapertuilluanngitsuliornermillu misigisaqarsimasut oqaluttuarusussasut, Anne Kirstine Hermann oqarpoq.
Anne Kirstine Hermannip Danmarkimi oqarasuaataata normu 27 59 19 10 aamma e-mailadressia ahermann@ruc.dk tunuliaqutaq pillugu paasisaqarnissamut pisussaaffiliinngitsumik oqaloqatigeeqqaartoqarsinnaavpq – imatut paasillugu, oqaatigineqartut issuaavigineqassanngillat tamanna nammineq piumanngikkukku. Aamma Kalaaleq ikiortitut suleqataa attavigisinnaavat Oline Inuusuttoq Olsen uani normumi 58 34 30.