Danmarkip angutitaasa Norge ajugaaffigalugu nunarsuarmi pissartanngorput

Danmarkip kiisami perloqqussut qaangerlugu nunarsuarmi pissartanngorniutivinnermi ajugaavoq. Tamanna sapaammi Herningimi Norgemut ajugaasoqarneratigut pivoq.

Qallunaat assammik arsaattartuisa angutitaat oqaluttuarisaanermi siullermeerlutik nunarsuarmi pissartatut imminnut taasinnaanngorput.

Herningimi Boxenimi ulikkaaqqasumi 15.000-inik tipaatsuataartunik isiginnaartoqartoq Danmark pissartanngorniutivinnermi Norge 31-22-imik ajugaaffigaa.

Danmark siornatigut pingasoriarluni nunarsuarmi pissartanngorniutivinnermi unammereerpoq, kisianni tamatigut ajorsartarluni.

Maanna arsaqataasut arlalippassuit ajorsarnerit kingulliit 2011-imi aamma 2013-imi peqataaffigaat.

Taamaalilluni perloqqussut taamaatinneqarpoq, pokaaliisivillu Europami 2008-mi aamma 2012-imi pissartanngornernik, kiisalu 2016-imi OL-imi pissartanngornermik imaqareersoq naammassineqarpoq.

Assammik arsaattartuni kinguaariit pissartat Mikkel Hansenimit, Niklas Landinimit aamma Rasmus Laugemit (OL-imi 2016-imi ajoquseqqalluni ilaanngitsup) timersuummi pissartaaffiit annersaasut maanna pissarsiarisimalerpaat.

Unammersuarnerup ingerlanerani pingaarutilinnik ajoqusertoqarsimagaluartoq, Danmark unammersuarnermi ajorsanngivilluni quleriarluni naammassinnippoq.

/ritzau/

Powered by Labrador CMS