Danmarkimut angalanissaq akeqanngitsumik allanngortinneqarsinnaalerpoq

Air Greenland aqqutigalugu Kalaallit Nunaannit Danmarkimut angalanissat akeqanngitsumik allanngortinneqarsinnaalerpoq. Taamaattoq angalanissat akii utertinneqarsinnaanngillat.

Kalaallit Nunaanni Covid-19-ip tuniluutilersinnaanerata aarlerinarnera eqqarsaatigalugu, Naalakkersuisut juullimut atatillugu Kalaallit Nunaata Danmarkillu akornanni angalasut killilersimaarnissaannik kissaateqarnerat naapertorlugu, Air Greenlandi Atlantikoq qulaallusu bilitsinik allanngortitsisinnaanermut periarfissiivoq.

Timmisartuutileqatigiiffik tusagassiutinut nalunaarummi allappoq.

Periarfissat

- Tassa Københavnip Kangerlussuullu akornanni sinerissamullu ingerlaqqillutik angalasussat, 2021-mi januarip 31-ata tungaanut akileeqqinnatik angalanissaminnut assingusumik aqqullu taanna atortussanngorlugu allanngortitsisinnaalerput, Air Greenland allappoq.

Takuss bilitsillit Air Greenlandip nittartagaatigut allanngortinneqarsinnaapput. Angalanissaq nutaaq kingusinnerpaamik 30. november 2021 pereersimassaaq.

Takuss-bilitsit piffissanut ukununnga allanngortinneqarsinnaanngillat:

  • 22. marts 2021 til og med 11. april 2021
  • 21. juni 2021 til og med 15. august 2021

Utertinneqarsinnaanngillat

Angalasut ulloq 6. september 2020 siusinnerusukkulluunniit Standard imaluunniit Premium bilitsimik pisisimasut, namminneerlutik Air Greenlandip nittartagaatigut ’Bilitsera’ atorlugu bilitsi allanngortissinnaavaat.

Bilitsit Takuss, Standard aamma Premiumit akii utertinneqarsinnaanngitsut Air Greenlandip nalunaarutigaa.

- Air Greenlandimit kaammattuutigaarput, angalanissamik allanngortitsiumasut tamarmik nittartagaq imaluunniit immersugassaq atussagaat, taamaasilluni amerlanerpaat piaarnerpaamik inniminniinissaat qulakkeerneqassammat, nalunaarutigineqarpoq.

Powered by Labrador CMS