Danmarkimit ikiorserneqarnissaq isumaqatigiissutigineqartoq
Kinguaassiutitigut kannguttaatsuliornerit akiorneqarnissaannut ikiorneqarnissamut siunnersuut Siumup aamma Nunatta Qitornaasa taperserpaat. Taamaalilluni partiit tamarmik piareersimapput.
Tasiilami aamma Kalaallit Nunaata sinnerani meeqqat ikiorneqarnissaannut Naalakkersuisut danskit naalagaaffiannut saaffiginneqquneqarnissaannut siunnersuut, Inatsisartuni partiit tamarmik maanna taperserpaat.
Ataatsimiittarfimmi oqallinnerup suli ingerlanneqarnerani tamanna ersarippoq.
Siumup oqaaseqartartuata, Karl-Kristian Krusep, siunnersuut taperseraa naqissuserpaa, ajornartorsiutillu annertuut aaqqiiviginissaannut Inatsisartut, Naalakkersuisut aamma kommunit akornanni siammasissumik suleqatigiinnissaat kajumissaarutigalugu. Tamatuma saniatigut sutigut ikiorneqarnissaq qulaajarneqassasoq kaammattuutigaa.
- Kommunit politiit eqqartuussiviillu qulaatiinnarlugit suliaq ingerlanneqartussaanngimmat taakku atuumassuteqartut tamaasa tusarniaaffigineqarnissaat ilanngullugu Siumumiit piumasaraarput, taanna oqarpoq.
- Suliassaqarfik taanna ukiuni 40-ni akisussaaffigisimallugu nassuerutigisariaqarparput. Akisussaaffillu taanna iperaannassanngilarput.
Nunatta Qitornaasa oqaaseqartartuata, Anders Benjaminsenip partiip siunnersuut taperseraa oqallinnermi oqaatigaa.
- Piumasaqarneq itigartillugu ikiorneqarnissamik pisariaqartitsineq nunap naalakkersuisuinit imminiiginnarneqarnera aamma pisariaqannginneranik nalilerneqarnera akuersaarneqarsinnaanngilaq, tamannalu akisussaassuseqanngitsumik naalakkersuinermik ingerlatsinerusoq isumaqarpugut. Inuiaqatigiinni meeqqat anniartorujussuupput, naak artorsaateqartorujussuusut uppernarsarneqarsinnaagaluartoq, ikiorneqarnissaat Naalakkersuisut itigartitsissutigaat, tamannalu akuerisinnaanngilarput, ikiunissamut piareersimasut piaartumik ilanngunneqarnissaat innersuutigaarput, Hans Enoksen (PN), siunnersuuteqartut sinnerlugit taama oqarpoq.
Siunnersuut taperserneqartoq Naalakkersuisut ullumi nalunaarutigaat.