Danmarkimit ikiorserneqarneq 5,3 millioner koruuninik nalilik
Danmarkimi naalakkersuisut Tasiilami meeqqat atugarliortut ikiorneqarnissaannut 5,3 millioner koruuninik immikkoortitsisimapput. Aaja Chemnitz Larsenip ikiorsiissutissat 'naammanngitsutut' taavai
Tunumi meeqqat kinguaassiuutitigut atornerlunneqarsimasut amerlasuutigut iluaqutaanngitsumik ilisimasalinnut ikiortissarsiortarput.
Taamaammat danskit naalakkersuisui aalajangesimapput, Kommuneqarfik Sermersuumi, Tasiilap inissisimaffigisaani, ikiuigasuartussanut aningaasaliissuteqarniarlutik.
Ullumi katillugit 5,3 millioner koruunit immikkoortinneqarput, Børne- og Indenrigsministeri Astrid Krag (S) ilisimatitsivoq.
- Aningaasat isumaginninnermi siunnersortinut, tarnip pissusaanik ilisimasalinnut ilaqutariinnillu katsorsaasartunut atorneqassapput. Taakku suliassarpassuit suliarineqarsimanngitsut pillugit kommunimut ikiuutissapput, aammali meeqqqanut isumagineqareersimasunut ikorfartuissapput, Astrid Krag oqarpoq.
Peqatigitillugu Danmarkimi naalakkersuisut Naalakkersuisulu aalajangersimapput, susassaqarfiit akimorlugit sulianik aallartitsisoqassasoq.
Suliat pineqartut, Tasiilami Kalaallillu Nunaata sinnerani meeqqat atugarliortut, piffissaq ungasinnerusoq eqqarsaatigalugu atugaasa qanoq pitsaanerulersinneqarsinnaanerat pillugu inassuteqaasiornermik inernilerneqassapput.
Naalakkersuisut ilaatigut Tasiilami meeqqat ikiorserneqarnissaat pillugu upernaaq Danmarkimut ikiortissarsiornerisa kingorna ikiorsiisoqalerpoq.
Kissaatigisaq tupaallarnartuuvoq, tassa Kalaallit Nunaata 1980-imili isumaginninnermut tunngassuteqartoq pisortatigoortumik nammineq akisussaaffigilernikuummagut.
Astrid Krag naapertorlugu, 5,3 millioner koruunit taakku aallarnisaataannaapput:
- Neriuutigaarput, pitsaasunik misilittagaqalissalluta Kalaallit Nunaanni sumiiffinnut allanut siammartersinnaasatsinnik. Anguniagaavoq meeqqat tamarmik atugaannik pitsaanerulersitsinissaq, Astrid Krag oqarpoq.
Kalaallit Nunaannit folketingimi ilaasortaq, Aaja Chemnitz Larsen Inuit Ataqatiiinneersoq, suliaq pillugu Astrid Kragimik aamma ministeriunermik Mette Frederiksenimik (S) ataatsimeeqateqarsimasoq aningaasat annertussusaat pillugu pakatseqqavoq.
Aamma ikiorsiissutissat amerlineqarnissaanik ministeri neriorsuuteqaraluartoq.
- Kinguaassiuutitigut atornerluisarnerpassuarnut tunngatillugu Danmarkip Kalaallit Nunaannut ikiuukkusunnera ajunngilaq. Ikiorsiissutissalli naammanngillat. Aningaasat amerlanerussasut isumaqaavikkaluarama.
- Atornerluisoqartannginnissaa anguniassagutsigu aningaasat amerlanerujussuusariaqarput, amerlanerusunillu aningaasaliisoqarumaartoq neriuutigilluinnarpara, Aaja Chemnitz Larsen oqarpoq.
Kalaallit Nunaanni meerarpassuit kinguaassiuutitigut atornerlunneqartartut ilisimaneqarpoq.
Kalaallit Nunaanni Politiit sapaatip akunnerani matumani kisitsisit saqqummiussaat naapertorlugit, Tasiilami meeqqat inuusuttullu kinguaassiuutitigut atornerlunneqarsimanerannik nalunaarutiginninnerit ukiuni kingullerni tallimani 191-iusimapput.
Taakku ukiut tamaasa sulianut 40-nut naapertuupput – sumiiffimmi 2000-ngajalluinnarnik innuttalimmi.