Danmarkimiit ikiorneqarnissaq inissinneqapallassaaq
Statsministerip Mette Frederiksenip Kalaallit Nunaat tikeraarmagu meeqqanik sumiginnagaasimasunik ikiuinissaq oqallisigisani pingaarnerit ilaraat
Kim Kielsenip Mette Frederiksenillu, nunatsinni tikeraarnerani, pingaarnertut oqaluuserisassarisimagaluarpaat: Meeqqat sumiginnagaasimasut nunatsinniit piumasarineqartutut Danmarkimiit ikiorneqarnissaat.
Kisianni statsministerip tikeraarnerani Amerikamiut præsidentiat nipituuliortoq malunnarnerusimavoq.
Nunatsinnulli sammisamut pingaarutilimmut piffissaaruttoqanngilaq. Meeqqanut sumiginnagaasimasunut paaqqinnittarfiit marluk pulaarnissaat programmimut ilanngunneqarsimapput. Ikiueriaasissarlu aamma oqaluuserineqarpoq.
Maajimi Inatsisartut Danmarkimiit ikiorneqarnissamut siunnersuut suliarimmassuk siullermik Siumut siunnersuummut akerliusimavoq. Partiili naalakkersuisoqatigiinni ikinnerussuteqartoqannginnerussammat pingaarnertut akuersisimavoq.
Maannali Kim Kielsen suliamut nangaassuteqarnani tunniusimavoq.
- Meeqqat siunissaat Mettelu eqqarsaatigeqaagut, Kim Kielsen tusagassiortunik katersortitsinerup naammassinerani oqarpoq.
Nunatsinni isumaginninnermut naalakkersuisoqarfik danskillu socialministereqarfiat Danmarkimiit ikiuinissaq sorleq iluaqutaanerpaassanersoq paasiniarlugu maanna sulissutigaat.
- Ministereqarfiillu akornanni inissinneqapallassaaq, Mette Frederiksen oqarpoq.
Juulip aallartinnerani peqqissutsimut isumaginninnermullu naalakkersuisup, Martha Abelsenip suleqatini danskeq isumaginninnermut nunamullu namminermut ministeri Astrid Krag Danmarkimiit ikiorneqarnissamut kissaatigineqartut tunniunniarlugit naapippaa.
- Akisussaaffik tiguneqarnikuuvoq, Kalaallit Nunaanniit aqunneqarpoq. Maanna Danmarki sunik ilanngussaqarsinnaanersoq misissussavarput, Mette Frederiksen oqarpoq.
- Meeqqat sumiginnagaanikut pillugit apeqqut uatsinnut pingaarutilerujuuvoq.