Danmarkimi nakorsaq: Kalaallit Nunaanni amerluutit pillugit politikkikkut suliaqartoqarnerusariaqarpoq
Bispebjerg Hospitalimi amit nakorsaqarfiani nakorsaaneq isumaqarpoq Kalaallit Nunaanni amerluuteqarnermut katsorsaasarnerit eqqumaffigineqarnerusariaqartut.
Kalaallit Nunaanni amerluuteqarnermut katsorsaasarnerit politikerinit eqqumaffigineqarnerusariaqarput.
Bispebjerg Hospitalimi amit nakorsaqarfiani nakorsaanerit taama ersaritsigisumik kissaateqarput.
Bispebjerg Hospitalimi amerissaavimmi nakorsaanerup Tove Agnerip anaanat pingasut meeqqatik ilagalugit Danmarkimut nakorsiartitsisimasut pillugit ilisimasaqarpoq. Meeqqat Danmarkimut nakorsiunneqartut amerluuteqarput, Danmarkimilu katsorsarneqarsimallutik.
Angajoqqaajusut angalanermut najugaqarnermullu aningaasartuutit najukkaminni tapersersorneqarlutik namminneq akilerpaat.
- Misissuinerit takutippaat Kalaallit Nunaanni eksemimik amerluuteqartut Danmarkimit amerlanerusut, Tove Agner Sermitsiaq.AG-mut oqarpoq.
Kalaallit Nunaanni 2019-imi misissuinerup takutippaa meeqqat suli atualinngitsut pingasuugaangata ataaseq eksemeqarluni amerluuteqartartoq. Danmarkimi taama amerluuteqartut ukioqatigiiaanni taakkunani 15-25 procentit missaanniipput. Taamaattumik nunatsinni amerluuteqarnerup katsorsarnissaanut paasilertornissaanullu unammilligassaqarpoq.
Telemedicin ilisimaneqarnerusinnaavoq
Tove Agner oqaluttuarpoq nunatsinni peqqinnissaqarfik aamma Bispebjerg Hospitalimi amilerisut pitsaasumik suleqatigiittut nunatsinni amerluuteqartut katsorsarneqartarnissaat pillugu.
Amerluuteqarnermut nakorsiarnermi teledermatologi atorlugu Danmarkimut assit nakorsiartullu journalii atortorissaarutitigut "Cosmic"-ikkut nassiunneqartarput. Danmarkimilu nakorsat toqqaannartumik nalilersueqataasinnaapput nunatsinnilu nakorsat siunnersorlugit katsorsaanissamut tunngatillugu.
- Oqarusuppunga Kalaallit Nunaanni suleqatimma suliatik naammassilluartarpaat. Suleqatigiinnerput ukiorpassuarni ineriartortissimasarput maanna ingerlalluarpoq, Sermitsiaq.AG-mut oqarpoq.
Taassumalli nassuerutigaa aamma teledermatologi immaqa ilisimaneqanngitsoorsimasinnaasartoq, nakorsiartummi ilaat katsorsarneqarneq naammaginagu namminneq aningaasartuuteqarlutik angalasariaqalersimapput pitsaasumik katsorsartinnissaq anguniarlugu.
- Kalaallit Nunaanni piffissap sivikitsup iluani namminneq akiliillutik nakorsiartunik tikittoqaqattaarnerata takutippaa, teledermatologimik ilisimasaqarneq immaqa annertunerusinnaagaluartoq. Sapaatip akunnera tamaat, ulloq unnuarlu piareersimasuuvugut tamatigut ikiuunnissamut. Atortorissaarut taanna atorluarneruneqarsinnaakutsoorpoq, Sermitsiaq.AG-mut oqarpoq.
Napparsimmavissuarmut nakorsiassagaanni innersuutsittoqartariaqarpoq
Nunatsinnit Danmarkimut namminneq angalallutik nakorsiartunut tunngatillugu Bispebjerg Hospital nunatsinni peqqinnissaqarfimmut aningaasartuutit matussusernissaanut tunngatillugu attaveqarsimavoq. Aningaasartuutit matussuserneqarsinnaappata nakorsiartoq angalanermut, najugaqarnermut katsorsarneqarnermullu aningaasartuuteqassanngilaq.
- Bispebjerg Hospitalimi nakorsiarlutik isertut suminngaanneeraluarpata soorunami anisiinnarunnanngilagut. Napparsimalluinnartut soorunami katsorsarneqassapput, Tove Agner oqarpoq.
Nunatsinniit Danmarkimut nakorsiartut peqqinnissaqarfimmiit akiliutsissinnaapput, taamaattoqassappalli nakorsiartoq nunatsinni peqqinnissaqarfimmit nakorsiarnissamut innersuunneqarsimassasoq, peqqinnissaqarfimmi qullersat Sermitsiaq.AG-mut ilisimatitsisimapput.