Danmark
Danmarkimi kommuni kalaallit suliffissarsiuunnerani ikiuuppoq
Suleqatigiinnermik suliniutikkut Danmarkimi kalaallit suliffissaaleqisut ikiorneqassapput
Danmarkimi kalaallit sulilernissaannut annertunersumik ikiorniarneqassapput.
Taamatut isumaqarpoq Aalborg Kommune, taannalu nunatsinni kommunimik suleqatigiinnissamik isumaqatigiissuteqarsimavoq. Isumaqatigiissutikkut kalaallit suliffissarsineqassapput, taamatut oqaluttuarpoq DR Nordjylland.
Aalborgimi Kalaallit Illuutaat isumaqatigiissummi aamma akulerutsinneqarsimavoq. Tassani pisortaq Søren Stach Nielsen isumaqarpoq suleqatigiinneq isumassarsiatsialaasoq.
– Paasiniassavarput kalaallit ingerlalluarnerusut qanoq isilluta sulilersissinnaanerivut, taanna oqarpoq.
Søren Stach Nielsen naapertorlugu Kommuneqarfik Sermersooq sanaartornermi sulisussaanik ujartuivoq. Tamannalu kinguneqartinniarneqarpoq.
Kulturit akornanni ataqatigiilersitsisoq
– Inuusuttunik 15-20-nik ujarlissaagut, taakkualu sapaatip akunnerini qulini pikkorissariarlutik angerlarlutik suliartussapput, pisortaq oqarpoq.
Tamatuma saniatigut kalaallit suliffissaaleqisut suliffissarsiuunniarneqarput Aalborgimi ingerlatsiviit, Kalaallit Nunaannut attuumassutillit, annertunerusumik attaveqarfiginerisigut. Ilaatigut imarsiornermik ingerlatsiviit.
Aalborg Kommunemi suliffissarsiuussisarfimmi pisortaq Jesper Dahlgaard naapertorlugu isumaqatigiissut aamma klturit akornanni ataqatigiissitsilersinnaavoq.
– Soorunami oqaatsit sapinngikkaluarlugit Kalaallit Nunaannit Danmarkimt nuulluni sorpassuaqarpoq allaanerusunik, suliffissarsiuussisarfiup pisortaa DR Nordjyllandimut oqarpoq.