Danmarkimi ilinniartut nutaanik siulersuisortaarput

Siulersuisut nutaat siulersuisuusimasut suliaannik nangitsinissaminnut qilanaarput, aammali kattuffimmut sunniuteqarumallutik, tusagassiorfinnut nalunaaruteqarlutik allapput.

- Avalammiit nuannaarutigalugu nalunaarutigisinnaavarput ileqquusumik ataatsimeersuarnermi 13. november nutaanik siulersuisuunertaaratta. Ataatsimeersuarneq Odensemi Nordatlantisk Husimi ingerlanneqarpoq.

Ileqquusumik ataatsimeersuarnermi ilaatigut covid-ip tuniluunnera, ulluinnarnullu sunniinera pillugu oqallittoqarpoq.

Ilinniartunut attuumassuteqarnerujumasut

Tunillaassuuttoqarnera nalorninartoqarnerusimavoq kisimiinnarnerusimallunilu: aaqqissuussat taamaatiinnarneqartartut, killilersuutit, angerlarsimalluni sulinerit attaveqaqatigiiffitsigullu ataatsimiinnerit. Sulialli qanoq aamma ingerlanneqarsinnaanerannik eqqarsartitsilersimavoq.

Siulersuisunngortut Danmarkimi ilinniartunut attaveqarnerujumallutik suliniuteqassapput, ilinnialinnginnerini aammalu ilinnialereersimanerini attaveqarnerussallutik.

- Avalammi ataqatigiilluarneq ilisimaneqarpoq, tamannalu attatiinnassagaanni ilinniartunut attaveqarneq pingaaruteqarluinnarpoq. Covid-19-ip ingerlatsinermullu aningaasartuutit ikilisinneqarnerisa tamanna unammillerluinnarsimavaa, siulersuisuunerit allapput.

Ataqatigiinnermut tunngasumik suliaqassasut

Siulersuisuunerit sapaatip akunnerata naanerata ilaanni ataatsimuussapput, ataqatigiinneq nukittorsassallugu siulersuisuunerusimasullu suliaannik nangitsinissamut naapissallutik.

- Siulersuusimasut siulersuisunngortut sulilluarnissaannik kissaappaat.

Siulersuisunngortut ukuupput:

• Siulittaasoq: Bentiaraq Bendtsen Ottosen
• Siulittaasup tullia: Lisbeth Efraimsen
• Aningaaserisoq: Junarak Andersen Berthelsen Mikaelsen
• Attaveqarnermut ataqatigiissaarisoq: Bikkittannguaq Geisler
• Nunat tamalaanut tunngatillugu ataqatigiissaarisoq: Rumle Labansen