Danmarkimi aningaasanut inatsit: Suliniutit nunatsinnut iluaqutaasussat arlallit
Folketingimi ilaasortat danskit aappaagu aningaasanut inatsisissaat sapaammi akueraat. Kalaallit Illuinut, ilisimatusarnermut, pisinnaatitaaffinnik suliaqarnermut peqqissartullu illuannut, Kalaallit Nunaannut iluaqutaasussanngorlugit aningaasaliisoqarpoq.
Aaja Chemnitz Larsen aamma Aki Matilda Høegh Dam danskit aappaagumut aningaasanut inatsisaanni Kalaallit Nunaannut tunngassuteqartunut aningaasanik illikartitsinerat iluarisimaarpaat.
Kalaallit Nunaannut aamma kalaallinut Danmarkimut najugaqartunut suliniutinut aningaasaliissutit arlaqarput.
- Aningaasaqarnermut ministeriaqarfik pitsaasumik ataatsimeeqatigisarsimavarput. Pingaartitagullu pillugit isumaqatigiissinnaasimagatta nuannerpoq. Nicolai Wammenimut, Folketingimi suleqatitsinnut IA-mut, Sambandsflokkurinimut aamma Javnaðarflokkurinimut nersualaarerusuppugut, Aki-Matilda Høegh-Dam tusagassiorfinnut nalunaarummi allappoq.
Siumut isumaqatiginninniarnermini Københavnimi kalaallit peqqissartut illuannut annertunerusumik aningaasaliinissamut suliniuteqarsimavoq. Peqqissartut illuat coronap tunillaassornerujussuanit killilersuutinit annertuumik eqqorneqarsimavoq.
Pisinnaatitaaffinnut paasititsiniarnermut aningaasat
Inuit Ataqatigiinnit Aaja Chemnitz Larsenip isumaqatiginninniarnerit suleqatiginnikkusunnermik imaqarluarnerat aamma iluarisimaarpaa.
- Meeqqat atugarliortut uummatinniitittaqaakka. Taamaammat Institut for Menneskerettigheder aamma Kalaallit Nunaanni Inuit Pisinnaatitaaffii pillugit Siunnersuisoqatigiit amerlanerusunik aningaasaliiffigineqarnissaannut suliniuteqarnissa ungasissimanngilaq. Uagut nammineq aningaasanut inatsisitsinni suliniutit taakku kingulliunneqarsimapput, politikkikkulli ukkatarineqartariaqavillutik.
Suliniutit milliuunilikkuutaat
Suliniutit arlallit folketingimi ilaasortaasut tusagassiorfinnut nalunaarutiminni taakkartorpaat.
Siumut ukunani isumaqatiginninniarsimavoq:
- Peqqissartut illuannut 4,4 mio. koruunit. Aningaasat najugaqartunut sammisaqartitsinermut atussapput.
- Kalaallit Illuannut 1,5 mio. koruunit. Aningaasat ilinniartut najugaqarnissaannut misissuinissamut atorneqassapput.
- Kalaallit meerartaat Danmarkimi angerlarsimaffiup avataanut inissinneqareernerup kingorna qanoq issusaat pillugu misissuinissamut 1,2 mio. koruunit.
- Kalaallit pineqaatissinneqarsimasut isertitsiviini betjentit nammineq oqaatsitik atorlugit ilinniartarnissaannut misissuisoqarnissamut 1 mio. koruunit atorneqassapput.
- Ilisimatusarnermut 3,5 mio. koruunit illikartinneqarput.
- DMI-mut 4 mio. koruunit, silap allanngornerata ulorianarsinnaasup, aamma aputit sisooratarsinnaanerannut kalerrisaarisartunut atortussanngortinneqarput.
IA taavai:
- Meeqqat pisinnaatitaaffiisa ilisimaneqarnerunissaannut 12 mio. koruunit illuartinneqarput.
- Kalaallisuumiit savalimmiormiusut ordbogiliornissamut 2 mio. koruunit.
- Pineqaatissinneqarsimasut isertitsiviini haship akiorneqarnissaanut 3,9 mio. koruunit. Qimmit hashimik narajorlutik nassaarniarsinnaasut sungiusarneqassapput.
Folketingimi ilaasortat marluullutik suliniutimittut taavaat naalagaaffeqatigiinneq pillugu isiginnaagassianik piviusulersaarutinillu suliaqartoqarnissaa. 26,8 milliuunit koruunit suliniummut illikartinneqarput.