amaqqut
Danmarkimi amaqqut piaraqatigiit arfineq-pingasut
Danmarkimi amaqqut maanna piaqqiorput. Piaraqatigiinnilu siullerni piaqqat pingasuinnaanatik arfineq-pingasorsuupput
Amaqqut piaqqat pingasut assingat Danmarkimi Naturstyrelsenip ippassaq saqqummiussaat, amaqqut piaraasa ilaminiinnarigaat paasinarsivoq, taakku ukiuni 200-ni Danmarkimi inuusut siullersaraat.
Piniartoq Henrik Sahlholdt Nielsen Jyllandip kangiani Ulfborgimeersup TV Midtvestikkut videomik immiussat amaqqut ilaqutariit arfineq-pingasunik piarartallit kingorna takutippai.
- Sapaatiummat piniarninnit immiussaapput. Tassanngaannaq amaqqut ilaqutariit saanniileriasaarpunga, taanna Ritzauimut oqarpoq.
- Eqqarsarnarpoq: What! Ilumoorsinnaava? Kisianni kingorna pinngortitamut qanoq kinguneqassanersut eqqarsaatigaara, aamma uanga ilaquttakkalu pinngortitami angalaaraangatta qanoq misigisarumaarnerluta, Henrik Sahlholdt oqarpoq.
Naturstyrelsenip sapaatip-akunneri marluk matuma siorna sumiiffimmi amaqqut piaraanik peqarnerarlugu tusarlerneqarput, taamaammallu Miljøstyrelsip akuerisaanik videoliuutinik ikkussivoq.
Assiliiviit ilaasa weekendimi piaqqat pingasut assilisimavai.