akit

Danmarkimi akit appariartorput - tamanna ukiuni kingullerni 60-ni takuneqarsimanngilaq

Atuisartunut akit januaarimi ukiumut kingullermut akigitinneqartunit appasinnerupput. Taamatut kingullermik 1954-mi pisoqarpoq

Julegave, betaling
Ilaqutariit meerartallit ukiumut kingullermut sanilliullugu 500 koruunimik atuinerusinnaapput ukioq manna - assi allaaserineqartumut attuumassuteqanngilaq

Atuisartunut akit kingullermik annikulleriarput 1954-mi, tamanna danskit naatsorsueqqissaartarfianni Danmarks Statistikimi takuneqarsinnaavoq.

Akigitinneqartummi januaarimi ukioq kingulleq januaarimit 0,1 procentimik annikinnerupput. Danmarkimi kingullermik taamatut pisoqarpoq ukiut 60-it matuma siorna.

Tassunga uuliap akia pissutaaqataavoq, kiassarnermummi akit appasinnerupput. Atisat kiisalu oqarasuaatit akikinnerulerput.

Taamatut akit appariarnerat aningaasaqarnermut pitsaanngitsumut takutitsineruvoq, taamaasilluni ineriartorneq unikaallassinnaalluni.

Danskit aningaasaqarnerannut tunissut
Aningaasaqarnerup taamatut isissisimanera danskit aningaasaqarnerannut tunissutitut Nordeami nalilersuisartumit Jan Størup Nielsenimit oqaatigineqarusunngilaq.

- Nukissiutit akiisa appariarnerat akikinnerulersitsinerat pisisartunut eqquisinnaanngikkallarpoq.

- Kisianni akit appariarnerat piffissami sivisuumi atuutissappat aningaasarsiarineqartut eqqorneqalersinnaapput, siunissamullu aningaasaqarnermut eqquisinnaallutik, oqaaseqaammi naliliivoq.

500 koruunit missaannik annikinnerusoq qaammamut
Danske Bankimit Las Olsen assingusumik oqaaseqarpoq. Atuisunut akit appariarnerat qanoq aningaasarsianut eqquinersoq oqaaseqarfigaa.

- Aningaasarsiarineqartut ukiumut 1,5 procentimik qaffariartarput. Sorsunnersuup kingornani aatsaat taama annikitsigaaq, taamaattumik malunnaatilimmik qaffariarneruvoq.

- Taamaattumik ilaqutariit meerartallit ukiumut kingullermut sanilliullugu 500 koruunimik atuinerusinnaapput ukioq manna, oqarpoq.

Ineqarnermut erniat annikinnerisa pissutigisaannik danskit aningaasaqarnerat siumut aallariarsinnaavoq.

Powered by Labrador CMS