Folketingimut qinersineq
Danmarki pillugu oqallinneq ima Demokraatinit pitsaanerulersinniarneqarpoq
Kalaallit Danmarkimut danskinullu pitsaanerusumik eqqartuisalertoqartalernissaa Demokraatit sinnerlugit Folketingimut qinigassanngortittup Randi Vestergaard Evaldsenimit anguniarneqarpoq
Demokraatini Danmarkimut danskinullu nikassaaneq piffissaajaatigerusunngilarput. Oqaloqatigerusuppagut, anguniagarpullu ersarippoq tassanilu danskit uangutsinnut kusanartumik eqqarsassasut uagut taakkununnga kusanartumik eqqarsarnitsitulli.
Demokraatit sinnerlugit Folketingimut qinigassanngortittoq Randi Vestergaard Evaldsen tusagassiutinut nalunaarummi allappoq.
Siumup Folketingimut qinigassanngortitaata Aleqa Hammondip 2013-mi naalakkersuisunut siulittaasuunerani danskit aviisiannit Informtionimit apersorneqarluni oqaaserisai assersuutitut tiguai. Tassami ilaatigut oqarpoq Danmarkimit pissarsiami pitsaanersarigaat bøfi aqittunik uanitsoqarlunilu kajortumi miseralik. Tassani apersorneqarnermini bloktilskudit taavai '3,6 milliartiminikasiit'.
Danmark sunniuteqarluaqataasoq
- Paasinnaalluarpara danskit tamakku nikassaatit nakeriallaatigisimassappatigit. Uanngut eqqarsartingalunga Danmarkimiit ajungitsorpassuarnik pissarsinikuuvunga. Ilinniarpunga akiligassarinngisannik. Ilaqutaqarpunga ikinnguteqarlungalu tikeraarlugit nuannarisannik. Taava aamma ukiumut bloktilskuditut 3,6 milliartimikasiit pisarneri nuannaraakka. Aningaasat taakku pissutaallutik nunatsinni tungiuineq ingerlavoq. Bloktilskudit pisanngitsuugutsigit peqqinnissaqarfik, utoqqalinersiat, inuusuttut ilinniarnersiutisiaat, suliffissaaleqisunut ikiorsiissutit allarpassuillu akissaqartinnavianngikkaluarpagut.
- Oqaloqatigiilluarnerup ataqqeqatigiinneq nassatarissavaa Demokraatini Danmarkimut danskinullu nikassaaneq piffissaajaatigerusunngilarput. Oqaloqatigerusuppagut, anguniagarpullu ersarippoq tassanilu danskit uangutsinnut kusanartumik eqqarsassasut uagut taakkununnga kusanartumik eqqarsarnitsitulli, Randi Vestergaard Evaldsen allappoq.
- Ataqqeqatigiinneq tunngavigigaanni suleqatigiilluarnerussaagut Danmarkimut Kalaallit Nunaannullu iluaqutaasumik. Nalunngilarpummi; imminut kusanartumik eqqartorneq akeqanngilaq. Oqallinnermi pissuserissaarneq atoqqilerniartigu, Demokraatit tunuliaqutaralugit Folketingimut qinigassanngortittoq oqarpoq.