Danmarki peqqinnissaqarfimmut akisussaaqqilissava?
Atassummit siunnersuutigineqarsimavoq, peqqinnissaqarfiup Danmarkimit akisussaaffigileqqinneqarnerani kinguneqaataasinnaasut pillugit Naalakkersisut misissuissasut. Siunnersuut inersuarmi partiinit amerlanerusunit akerlilerneqarpoq.
Peqqinnissaqarfimmut tunngatillugu akisussaaffiup Danmarkimut uterteqqinneqarnerani kinguneqaataasinnaasunik misissuisoqarnissaa pillugu siunnersuut inersuarmi marlunngormat oqallisigineqangaatsiarpoq.
- Pineqartup taamak soqutigineqartiginera nuannaarutigaarput, peqqinnissaqarfiummi annertuumik kivinneqarnissaa pisariaqarpoq. Tamatuma pisariaqavinnera pissutigalugu taamatut siunnersuuteqartariaqarsimavugut, Aqqalu Jerimiassen oqallittoqareersoq Sermitsiaq.AG-mut oqarpoq.
Atassummi ilaasortap Bentiaraq Ottesenip juunip qaammataani nalunaarutigaa, Kalaallit Nunaata peqqinnissaqarfik artoraa.
- Allaallu Peqqissutsimut Naalakkersuisoqarfik Naalagaaffimmut uterteqqinneqarnissaa periarfissatut eqqartortariaqalerparput.
- Ullumikkut Nunatta sineriaa qiviariarutsigu nakorsassaaleqinerit, peqqissaasussaaleqinerit illoqarfinni nunaqarfinnilu isorliunerusuni maluginiarneqarsinnaapput, Bentiaraq Ottosen juunip qaammataani tusagassiorfinnut nalunaaruteqarnermi oqarpoq.
Peqqinnissaqarfik nammineq aqukkusupparput
Taamatut oqaaseqarnera siunnersuummik inersuarmi marlunngornermi suliaqarnernik nassataqarpoq.
- Peqqinnissaqarfimmik oqartussaaffiup Naalagaaffimmut uterteqqissinnaanera pillugu Naalakkersuisut UKA2021-mut nalunaarusioqqullugit peqquneqarnissaannik Inatsisartut aalajangiiffigisassaattut siunnersuut. Nalunaarusiami qulaajarneqassapput oqartussaaffiup Naalagaaffimmut utertinneqarnerani qanoq aningaasatigut, sulisoqarnikkut kiffartuussinikkut, nunatsinnut aamma peqqissartunut kinguneqassanersoq, Atassummit taamatut siunnersuuteqartoqarpoq.
Peqqissutsimut Naalakkersuisup Anna Wangenheimip (D) akissuteqaammini oqaatigaa, ajornartorsiutit innuttaasunit ataasiakkaanit aaqqiiffigineqassasut, akisussaaffimmik allanut isumagisassanngortitsinani.
- Akisussaaffitsinnik allamut isumagisassanngortitsinikkut ajornartorsiutitsinnik aaqqiineq ajorpugut. Akisussaaffimmik tigusisarnissap ilikkarnissaa inuiaqatigiinnut inunnullu ataasiakkaanut pingaarnerpaat ilagaat. Assersuutigalugu peqqinnerusumik inooriaaseqarnissamut akisussaassuseqarnissaq, aammalu peqqinnissaqarfimmi sulisunik peqqinnissaqarfitsinni sulinissaminnut kajumitsilersumik pissusilersorfiginerisigut peqqinnissaqarfitsinnut akisussaaqataanissaq.
- Taamaattumik Naalakkersuisut siunnersuuteqartup siunnersuutigisaatut nalunaarusiornissamut isumalluutinik atuinissaq naapertuussorinngilaat siunnersuutillu itigartitsissutigineqarnissaa inassutigalugu.
Siunnersuut ataatsimiititaliamut suliassanngortinneqartoq
Amerlanerussuteqartut siunnersuut siullermeerlugu suliarineqarnerani itigartitsissutigaat, taamaakkaluartoq amerlanerussuteqartut, tassa Siumut, IA, Partii Naleraq Atassullu isumaqatigiipput siunnersuut inersuarmi aappassaaneerlugu suliarineqannginnerani ataatsimiititaliami suliarineqassasoq. Tamannalu siunnersuuteqartunit nuannaarutigineqarpoq.
- Partiit allat 1992-imi peqqinnissaqarfiup akisussaaffigineqalernerani kukkussuteqarsimanitsinnik nassuerutiginnikkumannginnerat uggornaraluartoq, siunnersuutip ataatsimiititaliami suliassanngortinneqarnera nuannaarutigaarput. Neriuutigaarput siunnersuutitta nassataanik peqqinnissaqarfimmik ingerlatsineq pitsaanerulersinneqarsinnaasssasoq, Aqqalu Jerimiassen oqarpoq.