Skip to main content

Danmarki oqartussaavoq

– Nunat tamalaat silarsuaanni Danmarki kisimiilluni Issittumut tunngasunik nalunaaruteqartarsinnaavoq, tamannalu qanittukkut USA-p Danmarkillu ataatsimiineranni erseqqissarneqarpoq, ilisimasooq Damien Degeorges oqarpoq

Kalaallit Nunaat Danmarkip naalagaaffianut ilaavoq. Kalaallit Nunaat immikkut naalagaaffiunngilaq, taamaattumik pissusissamisoorpoq Obamap Thorning-Schmidtillu nereqatigiinnerannut Kalaallit Nunaanneersup Hammondip qaaqquneqarsimannginnera.
Taamatut isumaqarpoq Kalaallit Nunaata nunanut tamalaanut attaveqarneranut ilisimatooq Damien Degeorges.
– Naalagaaffik Danmark oqartussaavoq nunanut allanut isumannaatsuunermullu politikki aammalu Issittoq eqqarsaatigalugit, ilisimatooq tikkuaavoq.
– Naalagaaffiit akornanni ataatsimiinnerusimavoq, sulilu Kalaallit Nunaat taamaattunngunngilaq. Issittoq pingaarnerutillugu oqaluuserineqanngilaq, oqaluuserisalli ilagiinnarsimallugu, Damien Degeorges Sermitsiaq.AG-mut oqarpoq.
Kalaallit Nunaat nunarsuarmi tamarmi soqutigineqarlualeraluartoq naalagaaffik ateqarpoq Danmark, nunallu tamalaani attuumassuteqarnerit naalagaaffiit akornanni pisarpoq. Tamanna peqatigalugu Danmarkip Kalaallillu Nunaata akornanni pissutsit isumaginiarneqassappata qanimut oqaloqatigiittarnissaq pisariaqarpoq, franskeq ilisimatooq isumaqarpoq, taannalu aamma Stockholmimiissimavoq USA-p Danmarkillu ataatsimiinnerisa nalaani.
– Peqatigiit marluk, Danmark Kalaallillu Nunaat, soorunami qanimut oqaloqatigiillutillu suleqatigiittariaqarput, pingaartumik ´Issittoq´ sammineqaleraangat, ilisimatooq oqarpoq ilanngullugu oqaatigalugu Kalaallit Nunaata namminersulivinnissaq sulissutigisariaqaraa nunat tamalaat ataatsimiinnerini peqataasarusukkuni:
Aamma atuaruk: Aleqa Obamamik nereqateqarnissamut qaaqqusaanngilaq
– Kalaallit Nunaannut allamik periarfissaqanngilaq ukiuni qulikkaani aggersuni sakkortuumik anguniassallugu naalagaaffinngornissani namminersortoq, Damien Georges oqarpoq.
Aleqap Helle pakatsissutigaa
Kalaallit Nunaata minitaanera Naalakkersuisut siulittaasuata Aleqa Hammondip pakatsissutigaa. Tassami ministeriuneq Helle Thorning-Schmidt siorna neriorsuisimavoq nunani tamalaani taamatut ataatsimiittoqaraangat, Issittoq Kalaallillu Nunaat oqaluuserineqarlutik, Kalaallit Nunaat peqataasassasoq.
– Nuannaarutigaara Issittoq nunani tamalaani pingaartinneqarluartarmat, aamma USA-p præsidentiata nunani avannarlerni ministeriunerit naalagaaffiilu pisortaat ataatsimeeqatigigaangagit, Aleqa Hammond qanittukkut tusagassiorfinnut nalunaarutikkut allappoq.
– Pakatsissutigaarali Danmarkip pisariaqartissimanngimmagu ataatsimiinnermi Kalaallit Nunaata toqqaannartumik peqataatinneqarnissaa, Aleqa Hammond allappoq ilanngullugu allalluni pingaaruteqartoq Kalaallit Nunaata akulerutsinnissaa:
– Ministeriunermut Helle Thorning-Schmidtimut tikkuarsimavara qanoq pingaaruteqartigisoq Issittoq Kalaallillu Nunaat nunanik allanik oqaloqatigiissutigineqaraangata aamma Kalaallit Nunaata tusaaniarneqartarnissaa - aamma nunani tamalaani ataatsimiittoqaraangat - aammalu ataatsimiinnerit politikerinik atorfilinnillu peqataasoqarlutik ingerlanneqaraangata, Naalakkersuisut siulittaasuat erseqqissaavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER