Danmarki Nunatsinni pillaatitut iliuusissanut tunngasumik inatsimmik suliaqarpoq
Nunatsinni suliassaqarfinnut naalagaaffeqatigiinnermut tunngasuni Ruslandimut pilaatissatut iliuusissanik atuutilersitsisinnaasumik, danskit naalakkersuisui inatsisissatut siunnersuummik tusarniaassuteqarput.
EU-p Ruslandimut pillaatitut iliuuseqarneranut Nunarput ilanngussinnaassappat, annertuumik suliaqartoqarnissaa pisariaqartinneqarpoq.
Naalakkersuisut EU-p pillaatitut iliuuseqarneranut maani nunatsinni atuutilersitsisinnaaneranut, Inatsisartut upernaaq inatsimmik akuersissuteqarput, inatsilli taanna naammanngilaq.
Pillaatitut iliuutsit ilaat naalagaaffeqatigiinnermi suliassaqarfiit iluanni danskit naalagaaffiata aalajangiiffigisartagaanni atuuteqqaassapput, taamaammallu danskit naalakkersuisui inatsisissatut siunnersuummik Folketingimi akuerineqartussamik suliaqarput.
Inatsisissatut siunnersuut tusarniaassutigineqaleqqammerpoq, Kalaallit Nunaannilu aningaaseriveqarnikkut, ingerlatsiveqarnikkut, naatsorsuuserinermi kukkunersiuisarfeqarnikkullu suliassaqarfinni aamma imaatigut silaannakkullu angallannermi isumannaallisaanermut tunngasuni Ruslandimut pillaatitut iliuuseqarsinnaalernissaq siunertaavoq.
Namminersorlutik Oqartussat ilanngunneqassapput
Pillaatitut iliuusissat Namminersorlutik oqartussat ilanngunneqarnerisa kingorna taamaallaat atuutilersinneqarsinnaassapput, danskit naalakkersuisui allapput.
- Inatsisissatut siunnersuutip inuussutissarsiornermut ministeri, inatsisinut atuutsitsinermut ministeri, inuussutissalerinermut ministeri, nunalerinermut aalisarnermullu ministeri aamma angallannermut ministeri, nalunaarutinik inatsisinik, inatsisinik Danmarkimi atuutereersuni imaluunniit atuutilersussanik atulersitsinissamut piginnaalersissavai, taamaattoq Kalaallit Nunaanni pissutsinut tunngasunik allannguuteqarsinnaassallutik, inatsisissatut siunnersuummi tamanna allaqqavoq.
Ruslandip Ukrainemi sakkutuulersornera pissutigalugu Naalakkersuisut EU-p pillaatitut iliuusaannik atuutilersitsinissaq kissaatigaat. Pillaatitut iliuutsit Kalaallit Nunaata peqataaffiginiarunigit nalunaarummik suliaqartoqaqqaassaaq. Tamanna suli pinngilaq.