Danmark tatineqartoq: »Tusagassiuutinut namminerisanut pisinnaatitaaffeqarneq«
Ukiakkut ataatsimiinnermi siunnersuutit akisussaaffinnik tigoraanermik sukkanerulersitsissapput aamma oqaatsit tusagassiuutillu pillugit immikkoortuni arlalinni naalagaaffimmut unammillissallutik. – Kalaallit Nunaat naalagaaffinngoriartuaalerpoq, Siumumut (S) ilaasortaq nassuiaavoq.
Ukiakkut ataatsimiinneq sapaatip-akunnerata tulliani aallartissaaq politikkikkullu siunnersuutinut, Kalaallit Nunaata namminiilivikkiartuaarnissamut aqqutaanik nukittorsaataasussanut tamatumalu peqatigisaanik kalaallinut Danmarkimi najugaqartunut atugassarititaasunik pitsaanerusunik qulakkeerinnittussanut sinaakkutaassalluni.
Aviisi AG taama allappoq.
Siunnersuutini immikkuullarissuseq tassaavoq, partiimit naalakkersuisuutitaqartumit Siumumit ilaasortamit pisuunerat, taamaalillutillu akuersissutigineqarnissaat ilimanaateqarluarluni.
Siumumeersup Kuno Fenckerip siunissami qaninnermi kalaallit Danmarkimi najugaqartut 17.000-it missaanniittut »inuiattut ikinnerussuteqartuunerannik« taamalu immikkut illersorneqarnissaannik pisinnaatitaaffeqarnissaannillu qulaajaanissamut Inatsisartunit taperserneqarnissani angorusuppaa.
Kuno Fencker nammineq isumaqarpoq, suliaq ersarissuusoq, Danmarkip ukiorpassuit matuma siorna FN-imi isumaqatigiissut (ILO-konvention nr. 169) akuersissutigisimammagu taamalu Inuit nunap inoqqaavisut pisortatigoortumik akuerisimallugit.
- Taamaalilluni Kunngeqarfik ikinnerussuteqartut taakkua illersornissaannut pisussaaffeqarpoq, Kuno Fencker siunnersuutimini nassuiaavoq.
Danmark annertunerusumik tatisinnaajumallugu Naalakkersuisut peqquniarpai naalagaaffimmut kaammattueqqullugit kalaallit Danmarkimi najugaqartut nunat tamalaat akornanni maleruagassat allat, ilaatigut Europami oqaatsit pillugit isumaqatigiissut, aallaavigalugit ikinnerussuteqartutut akuerineqarnissaat pillugu.
- Kalaallit Danmarkimiittut immikkut illersugaasinnaapput, naligiissitaaneq, kulturi kinaassutsillu namminerisamillu tusagassiuutit eqqarsaatigalugit. Kiisalu pisortaqarfinni, oqartussaasuni eqqartuussivimmilu suliani kalaallisullu ilinniartinneqarnissami killeqanngitsumik kalaallit oqaasiisa atornissaannut pisinnaatitaaffeqarlutik, Kuno Fencker nassuiaavoq.
Aviisimi AG-mi atuarnerusinnaavutit. Aviisi uani pissarsiariuk: