Danmark politikkikkut siunnersuisartumik Nuummukartitsisoq
USA Nuummi konsulatimik ammaaqqammereersoq, Danmark Kalaallit Nunaanni politikkikkut atorfimmik nutaamik pilersitsisimavoq.
Illersornissamut Ministeeriaqarfik politikkikkut siunnersortimik siunissami Nuummi sulisoqarusuppoq.
Siunnersorti nunarsuarmi qeqertat annersaanni isumannaallisaanermi politikkikkut tunngassuteqartut sammineqaleriartuinnarneranni, Danmarkimi Kalaallillu Nunaanni oqartussat akornanni atassuteqaataassaaq.
Siunnersorti ullumi sisamanngornermi illersornissamut ministeri Trine Bramsen (S) peqatigalugu Kalaallit Nunaannut tikissaaq, ingerlaannartumillu atorfissamini nutaami aallartissalluni.
- Aalajangersimavunga, siunissami Kalaallit Nunaanni politikkikkut siunnersorteqassalluta. Tamanna Issittumi isumannaallisaanermi politikkimut illersornissatigullu ineriartortitsinissamut atatillugu isigineqassaaq, Trine Bramsen oqarpoq.
Atorfillit paarlakaatsinneqassasut
Siunnersortitut atorfik Illersornissamut Ministeeriaqarfimmi atorfillit paarlakaallutik atorfigisassavaat.
Illersornissaqarfik Nuummi Issittumi Sakkutooqarfeqareerpoq, taakku Kalaallit Nunaanni upalungaarsimanermik isumaginnittuullutillu naalagaaffiup pigisaanik nakkutilliisarput.
Siunnersorti nutaaq Issittumi Sakkutooqarfiup illutaani allaffeqartinneqassaaq.
Politikkikkut siunnersorti taamaalilluni, USA-p Nuummi konsulitaavata Sung Choip juunimi atuutilersup allaffiata saniani allaffeqassaaq.
Danmarkilli siunnersortissaata atorfianik pilersitsineq, USA-p konsuleqalerneranut attuumassuteqanngilaq, Trine Bramsen erseqqissaavoq.
- Aalajangiineq manna qangali aalajangersimavara, taamaammat USA-mut attuumassuteqanngilaq. Danskit kalaallillu suleqatigiinnerat matumani pineqarpoq, taanna oqarpoq.
Illersornissamut ministerip Kalaallit Nunaanniinnermini Nuummi InterForcep immikkoortortaqarfissaa ammaanersioqataaffigissavaak.
Aamma atuarfuk: Illersornissaqarfik allaffimmik nutaamik Nuummi ammaavoq