Danmark Nunatsinnik tigumminniinnarniarluni kusanaattumik iliuuseqarsimanerangaasoq
Danmarkip pissaaneqarnini annaajumanagu FN kalaallillu salloqittartarsimavai, "Imperiets børn"-imik atuakkiortoq allappoq.
Atuakkiami nutaami Danmarkip Kalaallit Nunaat 1953-imi Danmarkimut ilanngunneqarnissaa qulakkeerniarlugu paasissutissanik kalaallinut FN-imullu isertuussisimasutut pasillerneqarpoq.
Aviisi Politiken taamatut allappoq.
Atuagaq, "Imperiets børn", tusagassiortumit Anne Kirstine Hermannimit suliarineqarsimasoq naapertorlugu, Kalaallit Nunaata nunasiaataanerminit Danmarkimi nunap ilaatut ilanngunneqarnissaa anguniarlugu 1953-imi tunngaviusumik inatsisip allanngortinneqarnerani pisimasut sammineqarput.
Danmarkimi allagaatit arlallit tunngavigalugit atuakkiaq suliarineqarsimavoq.
- Danmarkimi naalakkersuisut FN-ip ataatsimeersuarnerani paasissutissanik eqqunngitsunik tunniussisimanermik saniatigut Kalaallit Nunaanni innuttaasut pillugit paasissutissanik pingaarutilinnik isertuussisimapput. Taamaaliornermikkut 1954-imi Kalaallit Nunaat namminersulivinnissamut pisinnaatitaaffeqartoq FN-ip nunasiaataasut pillugit allattorsimaffianit peertissimavaat. Qeqertaq taamaalilluni isertuussatut nunasiaataalersimavoq, Anne Kirstene Hermanna atuakkiamini allappoq.
Taanna naapertorlugu allagaatini atuarneqarsinnaavoq, Danmarkimi naalakkersuisut 1940-kkut naalerneranni "Danmarkip oqartussaaffittut soqutigisani tunngavigalugit" suliaqarsimasut.
FN-imi isumaqatigiissutip Kunngeqarfik ulorianartorsiortissimagaa
Atuakkiortup atuakkiamini allaaserisimavaa, FN-ip isumaqatigiissutaani nunat nunasiaatilittut ilaasortaasut nunasiaatimik namminersulernissaannut politikkikkullu allanut pituttorsimanatik ingerlatsisarlernissaannut ikiuuttarnissaannik piumasaqaatip Danmarkip Kalaallit Nunaannik piginnittussatut pisinnaatitaaffia ulorianartorsiortissimagaa.
Anne Kirstine Hermann isumaqarpoq, Danmarkip qeqertamik nunasiaateqaannarnissaa ajornakusoortutut isikkoqamat, "isumatusaartumik" eqqarsaasersortoqarsimasoq.
Danmarkimi naalakkersuisut Kalaallit Nunaata nunasiaataanera akuersaaqqaartussaasimavaat. Kalaallilli Nunaat namminersortunngortivinnagu, Danmarkimut naligiissillugu nunap ilaatut ilanngutsissimavaat.
Danmarkip taamaalilluni aallartitani Kalaallit Nunaata nunasiaataajunnaarsimanera pillugu FN-imut nalunaaruteqartissinnaasimavai.
Pissutsit isertuunneqarsimasut
Kalaallit Nunaanni oqaluttuarisaanermik ilimasalik Jens Heinrich Kalaallit Nunaata nutaaliaasup oqaluttuarisaanera pillugu atuakkiorsimasoq aamma isumaqarpoq, Danmarki Kalaallit Nunaata naalagaaffimmut ilaatiinnarneqarnissaa anguniarlugu kusanaattumik iliuuseqarsimasoq.
- Danmarkip Kalaallillu Nunaata oqaluttuassartaasa ilaat tamanna isertuunneqarsimavoq, danskit sotutigsaat taamanikkut tunngavigineqarsimammata - atuagarlu manna tamatumannga erseqqissaaqataasinnaavoq. Taamanikkut naligiittut isumaqatiginninniartoqartarsimanngilaq. Tamanna pillugu Danmarki isornartorsiorneqarluarsinnaavoq, taanna Politikenimut oqarpoq.
Jens Heinrichilli tamatumunnga peqatigitillugu erseqqissaatigaa, nammineerluni misissuisimanerata takutikkaa, Kalaallit Nunaanni politikkerit inuiaqatigiit nutaaliaasumik ingerlanneqarnissaat namminneerlutik sorsuutigisimagaat.