Danmark Islandimut angalanissamik nangaasaarilersoq
Danmarkimi nunanut allanut ministereqarfik angalasunut ilitsersuutimini nutaanerpaami Islandimut angalanissanik pisariaqanngitsunik tamanik nangaasarivoq, Danmarkip naalagaaffianut innuttaassusillit Islandiliarsinnaanerannut maleruagassat sukannersut Islandimit atuutilersinneqarsimammata.
Islandip nunanit allanit Islandimut angalasunut tamanut, aamma Danmarkimit angalasunut, killilersuinerit aggustip 19-ianit sukannernerulersinniarpai. Tamatuma kinguneranik angalasut tamarmik marloriarlutik misissortittalissapput; tikinnermi aamma ullut tallimat qaangiunneranni. Tikinnermi misissortinnerup kingorna ornigassamut angalasoqarsinnaavoq tassanngaanniillu akissut utaqqillugu.
Angalasut ornikkaminniiginnassapput misissortinnerullu inernera utaqqillugu, kiisalu angalaqatigisat saniatigut inunnut allanut attaveqarnaveersaassallutik. Killilersuinerit aqqutigalugit angalanissamut kiffaanngissuseqarneq killilerneqartorujussuuvoq.
Assersuutigalugu angalasunut allanik inoqartutut ilimagineqarsinnaasut orninneqaqqusaanngillat, soorlu: neriniartarfiit, imerniartarfiit, pisiniarfiit naluttarfiillu. Islandimut angalasut taamaallaat sivikitsumik biilersinnaapput, kisianni takornariarnissaq imaluunniit illoqarfinnut arlalinnut ornigunnissaq siunertarinagu.
Killilersuinerit pissutigalugit nangaasaarutigineqartoq
Nunanut allanut ministereqarfiup Islandimut angalanissat pisariaqanngitsut tamaasa maanna nangaasaarutilerpai (orange) Danmarkimit Islandimut angalasunut Islandip tikinnermi killilersuineri pissutigalugit.
Nunanut allanut ministereqarfiup taamaalilluni EU-p/Schengenimut ilaasut Tuluit Nunaannillu Andorramut, Belgiamut, Bulgariamut, Luxembourgimut, Maltamut, Romaniamut, Spaniamullu angalanerit pisariaqanngitsut (orange) tamaasa maanna nangaasaarutigilerpai tunillatsissimasut amerlassusaat pissutigalugit. Kiisalu EU-p/Schengenimut ilaasut aamma UK-mit Irlandimut, Letlandimut, Estlandimut, Litauenimut aamma Islandimut angalanerit pisariaqanngitsut tamaasa nangaasaarutigilerlugit nunani taakkunani mattusimagallarnissamut maleruagassat pissutigalugit.
Angalanissanut ilitsersuut nutartigaq nunanut allanut ministereqarfiup nittartagaani takuneqarsinnaassaaq.