Danielsen: Umiarsualivinnik atuinermi akiliuteqartoqartalissaaq
Illoqarfiit pingaarnersaata avataani umiarsualivinnik aalisartut aliikkutaralugulu angalaartartut atuinerminni akiliuteqartarlernissaat qularutissaanngilaq. Apeqqutaaginnarpoq qaqugu tamanna atuutsinneqalissanersoq.
Nuummi Sikuki Nuuk Harbourimik atuisunut akiluteqartitsisoqartareerpoq, umiarsualivinnullu tunngatillugu inatsit 2015-imeersoq naapertorlugu Kalaallit Nunaanni umiarsualivinnik allanik atuinermi aamma akiliisitsisalernissaq pilersaarutaavoq.
Tamanna atuarneqarsinnaavoq, paragraf 37 naapertorlugu apeqqummut Attaveqaqatigiinnermut Naalakkersuisup Karl Frederik Danielsenip Partii Naleqqameersumut Jens Napãtôk-mut akissutaani.
Atuutsikkiartuaarneqassasoq
Atuisut akiliuteqartinneqartalernissaat atuutsikkiartuaarneqassaaq, Nuummilu atuutsitsilerneq aallarniutaannaavoq, Karl Frederik Danielsen eseqqissaavoq.
- Atuisut akiliuteqartinneqartalernerannik atuutsitsiartuaarnissaq pillugu suliaqarnermut
ilaatillugu soqutigisaqartut oqaloqatigineqartussaapput, Naalakkerusuisoq neriorsuivoq.
Karl Frederik Danielsenip atuisut akiliuteqartinneqartalernissaannut tunngavilersuutigaa, "umiarsualivitsinni pitsaassutsip tamarmiusup” qaffassarneqarnissaa.
- Qanoq pisoqaraluarpalluunniit, aammalu maannakkut umiarsualivinni aningaasaleeqqinnermut aningaasaliissutit maannakkutut annertussuseqaannassappata, umiarsualivinnut suliassaqarfimmut ataatsimut isigalugu annertunerusunik
aningaasaliisoqartussaassaaq, taamaaliornermi pitsanngorsaanissamut tunngavissat
ullumikkornit pitsaanerulissallutik, Karl Frederik Danielsen allaapoq.
Akitsuutaanngitsoq
Erseqqissaassutigineqarpoq, atuisut akiliuteqartinneqartalernerat umiarsualivimmiinnermi akitsuummut tapitartuuneqassanngitsoq. Atuisummi akiliutigisaat umiarsualivimmik aqutsisunut tutsinneqartussaapput, umiarsualivimmiinnermilu akitsuut Nunatta Karsianut nakkartinneqartussaalluni.