Skip to main content

Danielsen: Timmisartunut akitsuutit allanngortinneqarsinnaapput

Attaveqatigiinnermut Naalakkersuisup Karl Frederik Danielsenip timmisartunut akitsuutit ukiortaamiit allanngortinneqartussatut nalunaarutigineqarsimasut allanngortikkusussinnaavai. Sermitsiaq.AG-mut taama nalunaaruteqarpoq, allanngortoqassappalli tamanna piumasaqaatitaqarpoq.

Timmisartunut akitsuutit ukiortaamiit allanngortussat nunap iluani silaannakkut angalasunut, tassa kalaallinut, qanoq kinguneqassanersut Air Greenlandip pisortaata, Jacob Nitter Sørensenip Sermitsiaq.AG-mut oqaluttuarimmagu politikkikkut aalassattoqangaatsiarpoq.

Timmisartunut akitsuut ukioq kaajallallugu assigiinginnavittunngorpat ilaasartut nunap iluani ukiukkut angalanerminni ataasiarlutik unikkallaqqaarlutik apuuffissaminnut tikittut, timmisartumut akitsuutaat 55 procentimik qaffassaaq. Air Greenlandip naatsorsuinera naapertorlugu 55 procentimik qaffaaneq 220 koruunimik naleqarpoq. Nunanulli allanut angalanerni timmisartunut akitsuutit qaffanneqassanngillat, apparneqarlutilli.

Isornartorsiuinerit tusaavakka

- Isornartorsiuinerit tusaavakka, akitsuutissatullu aaqqinneqartut allanngortinneqassappata partiinut isumaqatiginninniarnissamut piareersimavunga. Mittarfeqarfinnulli aningaasassat nassaarineqartariaqarput, Karl Frederik Danielsen Sermitsiaq.AG-mut oqarpoq.

Akitsuutersuinissamut nutaamut naalakkersuisoqarfik naatsorsuusiorami 2017-imi angalasut amerlassusaat najoqqutarisimavaa. Naalakkersuisoqarfiup naatsorsuutai malillugit Mittarfeqarfiit 11,1 milliuunit koruuninik isertitaqarnerulissaaq. Air Greenlandilli naatsorsuutai, juni 2019-imiit ukioq ataaseq kingumut naatsorsuilluni suliaasimasut naapertorlugit, isertitaqarnerulernissaq 17 milliuunit koruunimiissaaq.

Aningaasaqarnerusariaqarpoq

- Mittarfeqarfiit aningaasaleeqqinnissamut 1 milliaardit koruunit amigaatigai. Mittarfiit pitsaasumik inissisimanissaat, matuneqannginnissaallu uanga akisussaaffigaara. Taamaammat Mittarfeqarfiit aningaasaliiffigineqarnerunissaat pisariaqarluinnarpoq, naalakkersuisoq erseqqissaavoq.

- Naalakkersuisut aalajangerput angalasut akiliissasut, imaanngitsoq inuiaqatigiit tamarmik, aningaasanut inatsit aqqutigalugu, akiliissasut, ilisimatitsivoq.

Namminersorlutik Oqartussat aningaasakilliortitsinerulerput

Ilumoorpa Namminersorlutik Oqartussat 2014-ip 2018-illu akornanni Nunatta Karsianut ukiumoortumik 11 milliuunit 14 milliuunit koruunillu akornanni akileeqqusisarsimanermigut Mittarfeqarfiit aningaasakilliortinnerulersimagai?

- Aap, tamanna ilumoorpoq, Karl Frederik Danielsen oqarpoq.

Pitsaajunnaavissimasut

Nunatta Karsia milliuunilikkaanik marlunnik kisitsisitalinnik ukiumoortumik iluanaaruteqartarsimavoq. Sooruna inuiaqatigiit akiliisinnafit angalasartut kisimik akiliisussanngortinneqartut?

- Qanorluunniit saatinniaraluaraanni, mittarfiit pigisagut ima pitsaajunnaavissimatigaat allaat mittarfiit Trafikstyrelsemit matuneqassanngippata aningaasanik nassaartariaqalerluta. Maangali pigama Mittarfeqarfiit aningaasaqarnerat pillugu annertuumik misissuivugut. Tamanna 2020-mut aningaasanut inatsisissatut siunnersuummi atuarneqarsinnaavoq, Karl Frederik Danielsen oqarpoq.

Taassuma erseqqissarpaa timmisartunut akitsuutit allanngortinneqarusunngippata aningaasat 11,1 milliuunit koruunit politikerit allaninngaanniit nassaarisariaqaraat.

- Taamaanngippat aningaasanut inatsimmut isumaqatiginninniutinut ilanngunneqartariaqassapput, naqissusiivoq.

Akit qaffassimasut nassuerutigaa

Akit nutaat pillugit ilimasaarinermi tusagassiutinut juulip 12-ani nalunaaruteqarassi allaqqavoq ”akigititaat 2013-imiilli akinut nalimmassarneqarsimanngitsut”. Tamanna 2014-imi, 2015-imi 2016-imilu akinut qaffaanermut akiliinermilu malittatisassianut nutaanut akinut qaffaatitsisunut qanoq ataqatigiikkami?

- Ilumoorpoq malittarisassat nutaanngorlugit ukiuni taakkunani allanngortinneqarnikuupput. Akilli nalimmassarneqannginnerat pissutaalluni Mittarfeqarfiit aningaasakilliornerulerpoq, Karl Frederik Danielsen oqarpoq.

Piuminarnerulersitsinissaq anguniagaavoq

Naalakkersuisoqarfimmi pisortaq Ruth Lindhardt apersuinermi peqataavoq. Taassuma ilisimatitsissutigaa malittarisassat pisariinnerulernissaat anguniarneqarsimasoq, nunanilu allani akitsuusersueriaaseq isumassarsiorfigineqarsimalluni, soorlu Nunani Avannarlerni pisariinnerusunik akitsuusersuinerit atorneqartut.

- Mittarfeqarfiit kissaatigaat akitsuusersueriaaseq pisariinnerussasoq, ajornannginneruniassammat allaffissornikkullu akikinneruniassammat, Ruth Lindhardt ilisimatitsivoq. Nunanit allanit akitsuusersueriaatsit isumassarsiorfigineqarmata, akitsuutissatut allannguutit timmisartuutileqatigiiffinnut tusarniutigineqannginnissaat aalajangerneqarsimavoq.

Visit Greenlandip isornartorsiuinera

Nunap iluani ukiuunerani angalasut akitsuutaasa qaffanneqarnissaat Visit Greenlandip tulluarsorinngilaa takornarialerusunullu akornutaasussatut isigalugu.

Takornarialerisut ukioq kaajallallugu takornarialerisalernissamik suliniuteqarnerannut tamanna akornutaalluinnassasoq, Visit Greenlandimi pisortaq Julia Pars Sermitsiaq.AG-mut oqaseqarpoq.

Sammisaq pillugu uani ataani atuarnerusinnaavutit:

Læs hele sagen:

  1. Det bliver dyrere at flyve fra nytår
  2. Timmisartumik ilaalluni angalaneq ukiortaamit akisunerulissaaq
  3. Atorsinnaanngilaq
  4. Det er en ommer
  5. Ny model for flyafgifter får det glatte lag
  6. Timmisartuussinernut akitsuusersueriaaseq isornartorsiorneqarpoq
  7. Flyafgifter modarbejder turisme-erhvervet
  8. Flyafgifts-model skal ændres
  9. Flyafgifts-model skal ændres
  10. Timmisartuussinermi akitsuutit allanngortinneqassapput
Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER