Danielsen: Meeqqat atuarfiannik ineriartortitsineq suliarineqaleruttorpoq

Suliniutinik tigussaasunik meeqqat atuarfiata pitsanngorsarneqaatissaanik aallartitsisoqarsimavoq, sulilu allanik pilersitsisoqartussaalluni, ilinniartitaanermut naalakkersuisuugallartoq, Karl Frederik Danielsen (S) nalunaarummi allappoq.

Taassuma ilinniartitsisut kattuffiata IMAK-ip, Sulisitsisut partiillu illuatungiliuttuusup Inuit Ataqatigiit isornartorsiutaar qisuariaateqarfigaa. Illutatungeriit isumaqarput, Naalakkersuisut meeqqat atuarfiannik aaqqissuusseqqinneq annertoor taamaatittariaqaraat, taarsiullugulu suliniutit minnerusut, meeqqat atuarfiannik maannakkorpiaq pitsanngorsaataasinnaasut, aallartillugit.

Tamakkuali arlallit suliarineqareersimasut Karl Frederik Danielsen erseqqissaavoq.

Ilaatigut makkua tikkuarpai:

• KIVITSISA: kommunini ataatsimoorussamik suliniut meeqqat atuarfiannik kivitsinissamik perorsaariaatsinik nutaanik suleriaatsinillu nutaanik aallaaveqartunik.
• Meeqqat atuarfiannik digitalinngortitsiartuaarneq, ilinniartitsinermi atortunik digitaliusunik suliaqarneq, piginnaasassanik digitaliusunik pilersitsiortorneq aammalu atortulersuusersuineq.
• Matematikkimut atatillugu immikkut suliniutinik ingerlatsisoqarpoq, misilitsinnerni angusat (3. aamma 7. klassit) naammaginanngimmata, soraarummeernernilu (10. klassini) angusaasartut ukiuni arlaqartuni appariartorsimammata.
• Ilinniartitsisunngorniarluni ilinniartitaaneq nutaamik isumaliuusersorluni aaqqissuussaq, atuarfinni pisortanik ilinniartitsineq nutaaq aamma meeqqat atuarfianni atuartitsisartut pisortallu piginnaasatigut ineriartortinneqarnerannik immikkut aallussineq.
• Oqaatsinut tunngatillugu suliassaqarfimmi oqaatsinik pigiliussisarnerup nukittorsarneqarnissaanik immikkut ilisimasallit suleqatigiit inassuteqaataat sulissutigineqarput.

- Kommuninit tamanit immikkut aammalu Naalakkersuisuniit suliassamik aallussisoqarpoq, ingerlaavartumillu ineriartortitsisoqarluni, - taamaattumik uanga isumaqanngilanga meeqqat atuarfiat uninngaannartoq.

- Maanna assigiinngitsunik pisoqarfiuvoq, soorluttaaq nalilersuinernit ineriartortitsinissanullu suliniutissani inassuteqaataasunik amerlasuunik siunnersuuteqartoq aallartinneqarsinnaasunik, Karl Frederik Danielsen oqarpoq.

Politikkikkut akuerineqarnissaat amigaataasoq

IA-p isornartorsiuinerminut tunngavilersuutigaa, meeqqat atuarfianni allanngortitsinissamut siunnersuutit arlallit ukiuni kingullerni itigartitsissutigineqartarsimanerannik imaluunniit kinguartinneqartarsimanerannik aaqqissuusseqqinnermik suliap ingerlanneqarnera innersuussutigalugu.

Karl Frederik Danielsen paasissutissiilluni oqarpoq, suliaq inassuteqaaterpassuarnik kinguneqareersimasoq, taakkuali politikkikkut oqaluuserineqarnissaat amigaataasoq:

- Tamakkua politikkikkut peqqissaartumik suliarineqassapput, suliniutissat avungarsuaq sunniuteqarsinnaammata.

- Suliat maannamut ingerlanneqareersut annertuut akueraavut, suliniutissallu aggersut aallartinneqarsinnaasut tamaasa qilanaaraakka, inassuteqaataasut politikkikkut suliarineqareerpata aallartissinnaammata, Karl Frederik Danielsen oqarpoq.